![](https://images.squarespace-cdn.com/content/v1/616fef2b7ae2990941e6d37b/1634725836522-JWHHF149Q4AKMWKAK6WG/DSC_1349.jpg)
Meeqqat toqqissisimallutik peroriartornissartik pisariaqartipaat
Kalaallit Nunaanni kattuffiit meeqqanik suliaqartut annerpaat ilaattut, meeqqat inuusuttullu pitsaasumik toqqissisimasumillu meeqqatut inuuneqarnissaat qularnaarniarlugu susassaqartunik arlalinnik suleqateqarpugut. Ukiut 100-ngajaat misilittakkagut tunngavigalugit, meeqqat unamminartitaasigut naaperiarnissaannut pisariaqartunik immikkut ilisimasaqalernikuuvugut, aamma kommuninik oqartussaasunillu allanik kinguneqarluartunik suleqateqarnissamik pingaaruteqarluinnartunik tunngavissamik pilersitsinikuuvugut.
Ikioqatigiinneq’ sumiiffinni ataasiakkaani suliniutinik patajaallisaasarpoq
’Ikioqatigiinneq’ aqqutigalugu sumiiffinni ataasiakkaani namminneq kajumissutsimikkut sulisut sulineranni tapersersorusuppagut, allallu peqataasalernissaannut isumassarsiterusullugit, illoqarfimminni nunaqarfimminniluunniit ilaqutariittut, meeqqatut inuusuttutullu inuuneq toqqissinartoq, pitsaasoq ineriartorfiusorlu tapersersoqqullugu.
’Ikioqatigiinneq’ iliuuseqarsinnaassusermik pilersitsisarpoq aamma ataatsimooqatigiiffiit inuttullu sammisaqaqatigiinnerit - illoqarfinni nunaqarfinnilu ataasiakkaani suussusilerneqartut, inerisarneqartut ingerlanneqartullu - aqqutigalugit periarfissiisarluni.
Najorti – meeqqat nipaat tusaaneqaqqullugit
‘Najorti’ tassaavoq tasiuillunilu illersuisoq. Tamannalu meeqqat tamarmik pisariaqartippaat – minnerunngitsumik meeqqat eqqugaaqqajaasinnaasut, immaqa angerlarsimaffimmik avataanut inissinneqartussanngortut imaluunniit ilaqutariinnut paarsisartunut imaluunniit ulloq unnuarlu paaqqinniffimmut inissinneqareersimasut. Najortit tassaapput meeqqanik illersuisuusartoqatigiit, Kalaallit Nunaanni meeqqat pisortanik naapitsineranni toqqissisimanissaannik qularnaarisartut. Najorti aqqutigalugu meeraq inuusuttorluunniit inersimasumik ingiallorneqartarpoq – najorteqartarpoq – isumaginninnikkut suliaq meeqqamut tunngasoq aalajangiiffigineqassatillugu.
Aasaanerani tammaarsimaartitsinerit – qaammat ilivitsoq meeqqanik inuusuttunillu sammisaqartitsinerit
2014-imiilli kommunit sumiiffinnilu ataasiakkaani inuiaqatigiit suleqatigalugit Kalaallit Nunaanni illoqarfinni nunaqarfinnilu mikinerusuni arlalinni aasaanerani tammaarsimaartitsisarpugut. Inuiaqatigiinnguaniilluni aasaq sivisusinnaasaqaaq, amerlaqisullu aasaanerani sulinngiffeqarnerup nalaani najugaqarfitsik qimallugu angalasinnaasanngillat. Taamaammat nunarsuarmit tamarmit namminneq kajumissusertik tunngavigalugu sulisut takkukkaagata persuarsiortoqartarpoq. Oqaatsit assigiinngitsut tusarsaalerlutillu sammisassarpassuaqaleriasaartarpoq, kulturillu naapinnerat meeqqat, namminneq kajumissutsiminnik sulisut angajoqqaallu peqataaffigilluartarpaat.
Persuttaasarnermik pitsaaliuineq atuartitsissutitut
Kalaallit meerartaasa pingajorarterutaat persuttaasarnermut attuumassuteqarlutik peroriartortarput. Ilinniartitsineq aqqutigalugu Kalaallit Meerartaat inuusuttut akornanni persuttaasarneq pitsaaliorniarlugu annikillisarniarlugulu suliniuteqarput, iliuuseqarsinnaanermut periarfissat pillugit ilisimasaqalersinnerisigut peqqinnartunillu ataatsimoorfeqalernissaannut tapersersornerisigut. Inuusuttut persuttaanermik qanimut misigisaqartartut taamaalisinnaasulluunniit anguniarneranni meeqqat atuarfiat qitiuvoq. Ukiup ingerlanerani ulluni atuarfiusuni pingasuni angajullerni atuartut periusissaminnik tigussaasunik assigiinngitsunik ilinniartinneqarlutillu sungiusarneqartarput, tamarmik persuttaasarnerup tununnissaanut sakkussinneqarlutik allatut periuseqalernissaannik siunertaqartut.