Nanortalimmi Kullorsuarmilu sapaatip-akunnerinut nuannisarffiusunut qujanaq
Nunanit allanit soorlu Ungarnimit, Mexico-mit, Tjekkiamit, Spaniamit Kinamillu namminneq kajumissutsimikkut sulisut Kullorsuarmi Nanortalimmilu sapaatip-akunnerisa pisoqarfioqisut kingorna qasuersaarput. Meeqqat inuusuttullu pinnguarluavissorput, ikinngutitaartorlutik tamarmillu siornatigut misilissimanngisaminnik misilitaqarput – aamma najukkami innuttaasut namminnerlu kajumissutsimikkut sulisut ulapeqaat, kikkut tamarmik puigugassarinngisaminnik misigisaqartinneqarnissaat anguniarlugu. Nanortalimmi Kullorsuarmilu sapaatip-akunnerinut nuannerluinnartunut qujanarsuaq!
Aasarsiorfimmi nuannattunnguaqarpoq, sammisaqartitsinerillu amerlanersaat silami ingerlanneqarput. Meeqqat ukiutik apeqqutaatinnagit pinnguaqatigiipput, meeraqatitillu ulluinnarni pinnguaqatigisanngisatik pinnguaqatigalugit. Aasaanerani sunngiffiup kingorna aasarsiortitsineq naammassereerpat, ataatsimooqatigiilluarneq ingerlaqqissaaq.
Aasarsiortitsinerit aammattaaq meeqqanut angajulliunerusunut naatsorsuussaapput, sammisaqartitsinerillu aaqqissuunneqartarput kikkulluunniit peqataasinnaanngorlugit. Kullorsuarmi meeqqat angajulliunerusut inuusuttullu ilaat qaqqaliarput naasortariarlutik. Kingornatigut naasortaasa suunerat qanorlu ittuunerat misissorneqarput.
Illup iluani pilersitsiffiusumik sammisassat amerlaqaat. Ilaasa nipilersuummik misilissimanngisaannakkaminnik nipilersorneq ilinniarpaat.
Aasarsiortitsinerit najukkami inuiaqatigiit tamaasa katersuutsittarpaat. Namminneq kajumissutsimikkut sulisut nunanit tamalaaneersut nunaminni nerisartagaannik nereqatigineqartarput, attaveqatigiinniarlunilu ussersortoqartarpoq – taavalu nipilersuutit nipittoriarlugit qitittoqartarluni.
