’SISI’ meeqqanut angerlarsimaffimmik avataanut inissitanut suliniutaavoq: Ataatsimooqatigiiffik meeqqat arlallit iluaqutigaat
’SISI’ tassaavoq kalaallit meeqqat angajoqqaaminni najugaqanngitsut ataatsimooqatigiiffiat. Suliniut angajoqqaarsiaasunit kommuninilu isumaginninnermit siunnersortinit tapersersorneqarpoq. Tamatuma kinguneraa meeqqat amerlanerit ataatsimooqatigiinnissamut periarfissaqalernerat, taama oqarpoq Jeppe Bülow Sørensen.
Upernaap ingerlanerani Danmarkimi meeqqat kalaallit angerlarsimaffimmik avataanut inissitaanikuusut SISI-mi ataatsimooqatigiittartut arfineq-marlunnik ilapput. Taakku meeraapput ulluinnarni meeqqanut kalaallinut allanut attaveqarneq ajortut aamma ilaquttaminnut kalaallinut attaveqarpianngitsut imaluunniit attaveqanngitsut. Kisianni meeqqat kulturikkut tunuliaqutarisaminnut attaveqartuarnissaq kultuminnillu ilisimaarinnittuarnissaq pisinnaatitaaffigivaat, taama nassuiaavoq Jeppe Bülow Sørensen, attaveqartitsiniarluni suliniummut ’SISI’-mut peqataasoq:
”Naalagaaffiit Peqatigiit meeqqat pillugit isumaqatigiissutaanni artikel 30 naapertorlugu, meeqqat inuusuttullu angerlarsimaffimmik avataanut inissitaanerminni oqaasii kulturikkullu tunuliaqutaat innarlitsaalineqartussaapput. Taamaalilluta uagut inuiaqatigiittut meeqqat taakku pisinnaatitaaffiisa illersornissaat immikkut pisussaaffigivarput. Taamaammat nuannaarutissaavoq angajoqqaarsiat kommuninilu isumaginninnermi siunnersortit tamatumunnga qanoq peqataasinnaanertik eqqumaffigimmassuk”.
Sapaatip-akunnerisa naanerini angalaaqatigiinnerni aasarsiornernilu meeqqat ataatsimoorlutik nuannersunik misigisaqarnissaminnut periarffissaqartarput. Aasaq manna meeqqat sapaatip-akunnerini arfinilinni Læsømiipput. Sissaliaqatigiinnerit, minigolfernerup naatsivimmilu pinnguarnerpassuit saniatigut, inuuissiortut kalaallisut erinarsorfigineqartarput, innalernermi kalaallit oqaluppalaavinik atuartoqartarluni Kalaallit Nunaallu pillugu oqaloqatigiittoqartaqaluni.
Suleqatigiinnissamik isumaqatigiissutip qularnaassavaa meeqqat inuusuttullu amerlanerit SISI-mut peqataasalernissaat
SISI ukiuni 9-ni ingerlareerpoq, SISI-llu sapinngisai annertusiartuinnartumik soqutigineqarlutillu akuersaarneqarput. Kingullertigut Aalborgip kommuniata SISI pillugu isumaqatigiissutip sivitsornissaa toqqarpaa, tamatumuunalu kommunip suliniutip ukiuni tulliuttuni pingasuni aningaasatigut tapersernissaa pisussaaffigilerpaa.
Nuuradiin Hussein Aalborgip Kommuniani suliffeqarnermut atugarissaarnissamullu rådmandiuvoq. Imalu oqarpoq:
”Meeqqap inuttut ilivitsutut misiginissaanut kinaassutsiminillu paasinninnissaanut oqaatsit kulturillu pingaaruteqarnerat nalunngilarput. Meeraq angerlarsimaffimmi avataanut inissinneqartillugu kommunitut meeqqap Kalaallit Nunaannit aallaaveqarnerminik annaasaqannginnissaanut annertusisamik akisussaaffeqarpugut. Uanga nammineerlunga siusinnerusukkut angerlarsimaffimmi avataanut inissitaasimasumik pulaagaqarnikuuvunga, taannalu oqaluttuarpoq, kalaallisut kulturimi ilarujussua annaasimallugu. Tamanna angerlarsimaffiup avataanut inissiinerup kingunerisa alianartut ilagaat, uagut inuiaqatigiittut sapinngisarput tamaat naapertorlugu pinngitsoortinniartariaqagarput”.
SISI – kalaallinut meeqqanut angerlarsimaffimmik avataanut inissitaanikuusunut attaveqaat – meeqqanut inuusuttunullu kalaallinut angerlarsimaffimmik avataanut inissitaasussanngortunut suliniutaavoq pingaaruteqarluinnartoq. Nuuradiin Hussein nangilluni itisilerivoq: ”Suliaq Kalaallit Meerartaasa isumagisaat, uagut Aalborgip Kommunianiit tapersersorumavarput. Aalborgip Kommuniani oqartussaasut sulianik angerlarsimaffiup avataanut inissiiffiusunik suliaqartut SISI sunaanersoq ilisimassavaat, aamma inissiisoqareernerata kingorna pingaartuuvoq ilisimasat tamakku angajoqqaarsianngortunut ingerlateqqinneqartarnissaat, meeqqat inuusuttullu SISI-mut peqataasarnissaannik tapersersorniassammatigit. Meeqqat tamarmik kulturikkut tunuliaqutarisatik tulluusimaarutigisariaqarpaat. Kalaallit meeqqat inuusuttullu kalaaliunertik tulluusimaarutigissavaat”.
SULINIUTIP TUNULIAQUTAA
Isumaqaginninnermut Nunamullu namminermut ministeeria naapertorlugu 2019-ip naanerani Danmarkimi meeqqat inuusuttullu kalaallinik angajoqqaallit 5 %-ii angerlarsimaffimmik avataanut inissitaanikuupput. Assersuussisagaanni meeqqat qallunaanik angajoqqaallit 1 %-iupput.
Kalaallit meeqqat angajoqqaarsiaqalerlutik paaqqinniffinniluunniit inissinneqaraangamik arlalitsigut kulturikkut tunngavitsik annaasarpaat, taamaammallu meeqqat kiserliortorujussuartut misigisinnaasarput. Meeqqani taakkunani allaanerusutut kukkusutullu misigineq initusaqaaq.