Kullorsuarmi aasarsiortitsineq: Namminneq kajumissutsimikkut sulisut ataatsimoorlutik nunaqarfimmi saliipput
Kalaallit Meerartaat aasaq manna Kullorsuarmi Nanortalimmi aasarsiortitsipput. Arsartoqarlunilu kongespil-ertoqarpoq, petangue aamma frisbee pinnguarineqarput, aamma illup iluani nunarsuarmit tamarmik pinnguaatinik pilersitsiffiusunik itinerusumik sammisaqarnissaq periarfissaqarpoq. Kullorsuarmilu sammisaq ataaseq allanit allaaneruvoq – nunaqarfimmiut namminnerlu kajumissutsimikkut sulisut ataatsimoorlutik nunaqarfimmut iluaqutaasussamik sammisaqarput: nunaqarfimmi saliineq.
Aasarsiortitsinerni pingaartinneqartarput nunaqarfimmi ingerlalluarnermik ataqatigiinnermillu annertusaasunik sammisaqartitsillunilu suliniuteqarnissaq, minnerunngitsumik meeqqanut inuusuttunullu – ukioq mannali salliutittariaqartumik pisariaqartitsisoqarpoq. Tassami nunaqarfimmi sumi tamaaniipput eqqagassat igikkiartorneqarsimanngitsut. ATV-nut eqqaanermi atorneqartartunut kommunimi sulisut ingerlatsinissaminnut allagartaqanngillat, taamaammallu aput ammat qamuteralannillu angallassisoqarsinnaajunnaarmat eqqagassat uninngatiinnarneqarsimapput. Eqqagassanut puussiarsuit, uumasut toqungasut, anartarfiit puussiaat eqqakkallu qimmit siammartersimasaat isigiuminaaqaat, tipeqalutillu, taama oqaluttuarpoq Aviaaja Danielsen, Kullorsuarmi najugaqartoq ’Camp Kullormilu’ nammineq kajumissutsimigut suleqataasoqq:
Eqqakkat tipillutillu peqqinnissamut ulorianarput
”Nunaqarfimmi pisuttuarneq nuannarisarpara, kisianni ukioq manna eqqagassanik eqqaaniarneq ajorluinnarpoq. Maajip qaammataaniit maannamut taamaallaat marlussoriaannarluni nunaqarfimmiit eqqagassat eqqaaviliaanneqarput, - tipeqaqaat peqqinnissamullu ulorianarlutik. Taama pisoqarnera uangaannaanngitsoq aliasuutigivara, arlallit namminneq kajumissutsimikkut eqqagassanik katersisarnikuupput, kisianni angallassinissamut allagartaqarata eqqaaviliaassisinnaangilagut, pissutsillu kipiluttunarnikooqaat”.
’ Camp Kullormi’ nammineq kajumissutsimigut sulisoq Aviaaja Danielsen Kullorsuarmi najugaqarpoq: “Ukioq manna eqqagassanik ajornartorsiutit ajorluinnarput”.
Helene Dørup Tuluit Nunaanni najugaqarpoq nunarsuarmillu tamarmit aggerlutik namminneq kajumissutsimikkut sulisunut ilaalluni. ”Namminneq kajumissutsimikkut sulisut Kullorsuarmiut nunanillu tamalaaneersut ullaakkut ataatsimiinnerisa ilaanni, saliilluni suliniuteqarnissaq eqqartorparput. Nunanit tamalaanit namminneq kajumissutsimikkut sulisut arlallit biilernermut allagartaqarput taamaalillutalu ajornartorsiutip qaangernissaanut peqataasinnaavugut”, Helene oqaluttuarpoq.
Innuttaasut aallarnisaanerat siumut aqqutissaavoq
Ullualunnguit ingerlaneranni Kullorsuarmiut nunanillu tamalaanit namminneq kajumissutsimikkut sulisut suleqatigiilluarnerisigut, saliisoqarnissaa aallartissinnaalerpoq. Kommunimi sulisut, Kullorsuarmit nunanillu tamalaanit ’Camp Kullormi’ namminneq kajumssiutsimikkut sulisut innuttaasullu peqataarusuttut allat, takkussuupput, ullullu ataatsip ingerlanerani eqqagassat annertoqisumik annikillisinneqarlutik.
Aviaaja aamma Helene tamarmik isumaqarput suliaq iluatsilluartoq. ”Nuannisartoqaqaaq aamma Kullorsuarmi innuttaasunit kommunimiillu periataallaqqittoqarlunilu inussiarnisaartoqaqaaq. Peqataaneq isumaqarluartutut misiginarpoq”, Helene oqaluttuarpoq. Aamma Aviaajap inuit taama amerlatigisut ataatsimoorlutik suliassap isumaginissaanut peqataanerat nuannaarutigaa. ”Maanna nunaqarfimmi pisuttuarneq nuannerseqqippoq, tipeqarpallaarunnaarporlu. Neriuppunga suliniuteqarnerup tamatsinnut ersersikkaa, innuttaasunit suliniuteqarneq allanngueqataasinnaasoq, aamma ersersinneqartoq allatigut nunaqarfimmi ajornartorsiutigut iliuuseqarfigisinnaagigut, eqqagassanik eqqaaneruppat allanilluunniit suliaqarneruppat”, Aviaaja naggasiivoq.