Najukkami ataatsimooqatigiiffiit Kalaallit Nunaanni meeqqanik inuusuttunillllu ingerlalluarnerannik patajaallisaapput
Sumiiffinni mikinerusuni suliniutit pitsaasut ikioqatigiilluni inerisarneqaraangata, meeqqat inuusuttullu iliuuseqarsinnaanerulerlutillu ingerlalluarnerulersarput. Tamanna Kullorsuarmi Nanortalimmilu misiliummik suliniuteqarnermit misilittagarineqalerpoq, maannalu suliniut Nordea-fondenimit taperserneqarluni illoqarfinnut mikinerusunut nunaqarfinnullu amerlanernut siammaanneqassaaq.
Ukiup kingulliup ingerlanerani Kalaallit Meerartaat Avannaani Kullorsuarmi Kujataanilu Nanortalimmi najukkami inuiaqatigiinnik tapersersuinissamut periutsinik misileraapput, meeqqat inuusuttullu toqqissinartumik ineriartorfiusumillu inuuneqalersinnissaat siunertaralugu. Suliniut taanna taaguuteqarpoq ’Ikioqatigiineq’. Misilittagaalersut pitsaangaarmata Nordea-fonden aalajangerpoq suliniut aningaasaliiffiginiarlugu, taamaalillunilu ’Ikioqatigiinnerup’ illoqarfinnut nunaqarfinnullu amerlanerusunut siammaanneqarnissaa qularnaarneqarsinnaalerpoq.
”Nordea-fondenip aallussaraa, meeqqat inuusuttullu tamarmik ineriartorluarnissamut periarfissaqarnissaat allanillu peqateqarlutik inuunerissaarlutik peroriartornissaat. Upperivarpullu ataatsimooqatigiiffiit patajaatsut sumiiffinni ataasiakkaani inuiaqatigiinnik ineriartortitseqataasinnaasut tamanut iluaqutaallunilu nuannaarutaasumik. Taamaammat Nordea-fondenimiit tulluusimaarutigivarput suliniut ’Ikioqatigiitta’ tapersersinnaagatsigu, tassuunakkummi sumiiffinni ataasiakkaani ataqatigiinneq patajaallisarneqarpoq, meeqqat inuusuttullu ataatsimooqatigiiffinnut pitsaasunut ineriartorfiusunullu peqataanissaat qitiutillugu,” taama oqarpoq Nordea-fondenimi aningaasaliisarnermi pisortaq Christine Paludan-Müller.
Sumiiffinni ataasiakkaani aallaaveqarneq allannguutinik ataavartunik pilersitsisarpoq
Ukiut qulit ingerlanerini Kalaallit Meerartaat Kalaallit Nunaannni tamarmi inuiaqatigiinni mikinerusuni aasarsiortitsisarluni suliaqarnikuuvoq. Ukiorpassuarnilu misilittakkat sumiiffinnilu ataasiakkaani attaveqaatit patajaatsut maanna ataavartumik suliniuteqalernermik ’Ikioqatigiinnermik’ kinguneqarput, taama oqarpoq Kalaallit Meerartaanni allattoqarfimmi pisortaq.
”Sumiiffinni ataasiakkaani inunnut isumalluutaalluartunut qanimut attaveqalernikuuvugut, ataatsimoorlutalu najukkami inuiaqatigiinnik patajaatsunik meeqqanut inuusuttunullu nutaanik periarfissiisunik pilersitsisinnaavugut – aamma sunngiffimmi sammisassaqartitsinernut nalinginnaasumik peqataasanngikkaluartunut. ’Ikioqatigiinneq’ aqqutigalugu suliat ingerlareersut aaqqissuulluakkamik tapersersorpagut, tamanut iluaqutaasumik imminnullu napatissinnaasumik ineriartorsinnaaqqullugit,” Julie Lynge oqarpoq.
Suleqatigiinnerup suliniuteqarneq patajaallisarpaa
Ikioqatigiinneq ingerlanneqarpoq Kalaallit Meerartaasa aamma SOS Børnebyerne suleqatigiinnerisigut, suleqatigiinnerullu tamatuma qularnaassavaa, ilisimasat periutsillu sapinngisamik amerlanerpaanut siammaanneqarnissaat. SOS Børnebyerne nunarsuaq tamakkerlugu nunani 135-nik amerlanerusuni ilaqutariinnik atugarliortunik sullissivoq.
’Ikioqatigiinneq’ misiliummik suliniutitut Kullorsuarmi Nanortalimmilu 2023-mi aallartippoq, ukiunilu aggersuni sumiiffinni ataasiakkaani inuiaqatigiinnut amerlanerusunut siammaanneqassalluni.