Aarhusimi Kalaallit Meerartaanni inuusuttunik sullissinermi ataqatigiissaarisussamik pissarsiorpugut
Inuusuttunik atugarlioqqajaasunik akuersaartumik attaveqalersitsillunilu sullissinermik soqutigisaqarlutillu ilisimasaqarpit, ilutigisaanillu aalajangersimasunik suliniuteqarnermik soqutigisaqarpit ataqatigiissaarillaqqillutillu? Taamaappat immaqa illit tassaavutit kalaallinik inuusuttunik pitsaaliuilluta suliaqarnitta patajaallisarlugulu sammivilernissaanut suleqatissatut ujartugarput.
Inuusuttunut suliniutigut ullumikkut pingasuupput – Inuusuttunik tammaarsimaartitsisarnerit, Uagut aamma Siammartoq – tamarmik immikkut assigiinngitsunik saaffigisaqartut. Inuusuttunik sullissinerput patajaallisarumavarput sammisaqartitsisarnerit ataqatigiissinnerulerlugit sammisaqartitsinerillu akornanni ikaarsaariarnissat pitsaanerulersillugit, ilaatigut sammisaqartitsineq nutaaq ”Suluk” pilersillugu, tassani namminneq kajumissutsimikkut sulisut kalaallit inuusuttunut mentorissatut ilinniartissallugit. Saaffigisavut tassaapput Danmarkimi kalaallit inuusuttut 16-iniik 26-nut ukiullit, anguniagaavorlu ingerlalluarnerunissamut aamma inuiaqatigiinnut akuunerulernissamut tapersersueqataanissaq kiisalu kalaallit inuusuttut ilinniagaqarnissaannut aamma/imaluunniit suliffeqalernissamut ikaarsaariarfiliinissaq.
Suliassannut ilaatigut makku ilaapput:
Inuusuttunut suliniutitta nalinginnaasumik patajaallisarneqarlutik, sinaakkuserneqarlutik inerisarneqarnissaannut peqataaneq
Aarhusimi, Vejle-mi Esbjergimilu inuuusuttut kalaallit sullinneranni ataqatigiissaarisuuneq
Inuusuttunik sammisaqartitsinitsinni arlalinni peqataaneq (siumoortumik pilersaarusioreernikkut ukiumut sapaatip-akunnerisa naaneri 6-8)
Sumiiffinni ataasiakkaani suleqatinik, peqatigiiffinnik, pisortaqarfinnik suleqatigissallugillu naapertuuttunik allanik suleqateqarneq.
Pingaartuuvoq suliannik nammineerlutit pilersaarusiorsinnaanissat illillu nammineq sulitillutit inuunerpit pilersinnissaanut aallarnisaasinnaanissaat. Aamma piareersimaffigisariaqarpat sulinerpit ilaa allami pisarsinnaassammat, assersuutigalugu inuusuttup angerlarsimaffiani sumiiffinniluunniit allani. Suleqatitit annertuumik suleqatigisassavatit, kisianni suliami annertuumik nammineersinnaanissaq piumasaavoq. Akerlianik makku neqeroorutigisinnaavagut:
Suliaq nammineerfiusoq eqaatsumillu aaqqissuunneqarsinnaasoq suliniutinullu annertuumik sunniuteqarfiusoq, suleqatit ammasumik pissuseqarlutik suliaminnillu piginnaasaqarluarlutik tunniusimasut peqatigalugit
Suliaq inuusuttut ataasiakkaat sullinnissaannut piffissaqarfiusoq
Suliassat tamatigoortut suleqatigisassallu assigiinngitsorpassuit
Illit pillutit
Naapertuuttumik ingerlaqqiffiusumik ilinniagaqartuussaatit, ajornanngippat meeqqanik inuusuttunillu sullissinermut attuumassuteqartumik aamma meeqqanik, inuusuttunik angajoqqaanillu atugarlioqqajaasunik sullissinermik misilittagaqassaatit
Suliniutinik aalajangersimasunik suliaqarnermik ataqatigiissaarillunilu suliaqarnermik misilittagaqassaatit allatut ilinniagalinnik kommuninillu suleqateqarnermik misilittagaqarlutit
Perorsaanikkut periutsip peqatigiiffiullu anguniagaasa imminnut ataqatigiinnerat eqqarsaatersuutigisinnaassavat, akuersaartuullutit, nammineq aallarnisaasinnaassuseqarlutit ataatsikkullu arlalippassuarnik ingerlataqarsinnaassallutit – aamma ulapileruttorfiup nalaani
Kalaallit Nunaat kalaallillu kulturiat pillugu ilisimasaqassaatit soqutiginnillutilluunniit
Namminneq kajumissutsimikkut sulisut aqutarinerannik misilittagaqassaatit aamma/imaluunniit tamanna pitsaasumik unammilligassatut isigalugu
Ukiumut sapaatip-akunnerisa naanerini 8-t missaanni qaammammullu unnuit 2-4 missaanni sulisinnaassaatit.
Viby-mi Gunnar Clausensvejimi allaffeqarpugut, tassanngaanniillu pingaarnertut aallaaveqartassaatit. Ulluinnarni suleqatigiinnut pingasunik inuttalinnut peqataassaatit saniatigullu namminneq kajumissutsimikkut sulisut arlallit suleqatigisassallugit. Aammattaaq Vejle-mi Esbjergimilu suliassaqartassaatit, taamaalillutillu illoqarfinni taakkunani suleqatigiit marluk aamma qanimut suleqatigisassallugit. Taakku saniatigut nuna tamakkerlugu siammaassimasunik suleqateqartassaatit, tassami Københavnimi, Århusimi, Aalborgimi, Vejle-mi aamma Esbjergimi suliniuteqarpugut. Aamma Københavnimiippoq allattoqarfipput nuna tamakkerlugu meeqqanut, inuusuttunut ilaqutariinnullu suliniutitsinnik ikorfartuisuusumik. Aammattaaq Nuummi allattoqarfeqarpugut, Kalaallit Nunaanni meeqqanik ilaqutariinnillu suliniutinik suliaqartuusumik.
Atorfik sapaatip-akunneranut nalunaaquttap akunnerini 37-ni suliffiuvoq, piffissat suliffissat nikerarlutik, tamatumunngalu ilanngulugu ilimagisaavoq ukiumut sapaatip-akunnerisa naanerini 6-8-ni sulisarnissaq. Aammattaaq sapaatip-akunneranut ataatsip missaani ualikkut unnukkullu sulisoqartassaaq.
Atorfimmi aallartiffissaq: 1. oktober 2024-p missaani tamatumaluunniit kingorna piaarnerpaamik.
Qinnuteqarnissamut killiliussaq: sapaat, 1. sep. nal. 00.00. Qinnuteqaat uunga nassiunneqassaaq: job@fgb.dk. Qinnuteqaateqartunit toqqakkat ilisimatinneqassapput 6. september. Atorfinitsitsiniarnermut atatillugu oqaloqatigiinnerit ingerlanneqassapput pingasunngornermi 11. september uani: Gunnar Clausens Vej 24A, 1 tv, 8260 Viby. Atorfik pillugu apeqqutissaqaruit Danmarkimi meeqqanut, inuusuttunut ilaqutariinnullu suliniuteqarnermi pisortaq Jeanne Funch Asmussen attavigisinnaavat oqarasuaat 29209085 sianerfigalugu, ulluinnarni nal. 10-15.
Kalaallit Meerartaat pillugit
Kalaallit Meerartaasa meeqqat kalaallit atugarisaasa pitsaanerulernissaat anguniagaraa. Kalaallit Nunaanni Danmarkimilu sulivugut, suliniutit assigiinngitsut meeqqanik sullissinermut tunngasut arlallit ingerlallugit, soorlu meeqqanik ilaqutariinnillu sammisassaqartitsinerit, isumaginninnikkut suliani meeqqanik illersuisoqartitsineq aamma meeqqanik angerlarsimaffimmik avataanut inissitaasimasunik sammisaqartitsinerit inuusuttunullu kalaallinut ataatsimooqatigiiffiit ineriartorfiusut. Suliniutit tamarmik ingerlanneqartarput najukkami oqartussaasut, kattuffiit, sulisut, meeqqat inuusuttullu qanimut suleqatigalugit - sumiiffinni ataasiakkaani kulturi oqaatsillu ataqqillugit.