Danmarkimi kommunit tamarmik Sulianik Suliaqarneq Pitsaanerusoq sunaanersoq ilisimassavaat
Sulianik Suliaqarneq Pitsaanerusoq tassaavopq suliniut nutaaq, meeqqat ilaqutariillu kalaallit Danmarkimi kommunimi suliaalersillugit, kommunit sullissinerannik pitsanngorsaanissamik siunertaqartoq. Suliniut kommuninut neqeroorutaavoq akeqanngitsoq, kommunini ilaqutariit pillugit sulianik suliaqartunut paasissutissiinissamik suliamullu atatillugu isumasioqatigiittarnissamik neqeroorutaasoq. “Aallartereerpugut soqutiginninnerlu annertoqaaq, kisianni suli amerlanerusunut anngukkusuppugut”, taama oqarpoq Jeppe Bülow Sørensen, Kalaallit Meerartaanni Danmarkimi pisortaqarfinnik siunnersuinermut suleqateqarnermullu pisortaq.
Kalaallit Nunaanni pissutsit amerlaqisut Danmarkimiit allaaneroqaat, aamma meeqqat ilaqutariillu kalaallit Danmarkimi kommuninit ikiorserneqassatillugit kulturikkut assigiinngissutsit tulleriiaaginnarsinnaasarput, paatsooqatigiinnermik kinguneqartumik. Kalaallit Meerartaanni suliniummik aallartitsinikuuvugut, suliniullu taanna aqqutigalugu Danmarkimi kommunini isumaginninnermi siunnersortit suliaminnut atatillugu siunnersorneqarsinnaapput – ilaqutariinnik kalaallinik sullissisussaatillutik. Tamatumani pineqarput kalaallit imaluunniit Kalaallit Nunaannnik ilisimasaqarluartut suleqatigiit, meeqqat pillugit suliani ataasiakkaani isumaginninnermi siunnersortinit isumasiorneqarsinnaasut. Aamma ilaqutariit kalaallit atugarlioqqajaasut akornanni pitsaaliuilluni suliaqarneq patajaallisarniarlugu, ulluni aalajangersimasumik qulequtsiilluni sammisaqarfiusuni ornigulluta peqataasarpugut, ilaqutariit kalaallit Danmarkimut nuunnerminni unamminartutut misigisinnaasaat pillugit oqaluttuariartorluta.
’Social Talks’ suleqatigalugu sulisunut ilaqutariinnik kalaallinik sullissisunut internet aqqutigalugu isumasioqatigiissitsisarpugut. Internetikkoorlugu isumasioqatigiissitsineq tulleq ingerlanneqassaaq 8.oktober 2024
“Misigivunga ilaqutariit kalaallit ammanerusumik ilisimasaqarnerullunilu naapinnissaat annertuumik soqutigineqartoq, ilisimasaqarnerulernissarlu alapernaanneqarluni. Kisianni siunissami annertuumik paasititsiniaasussaavugut”, Jeppe Bülow Sørensen oqarpoq nangillunilu: “Sulianik Suliaqarneq Pitsaanerusoq kommuninut neqeroorutaavoq, taamaalillunilu inatsisitigut piumasaqaataanani. Taamaammat assigiinngitsunik periuseqarluta kommuninut tamanut anngunniarsarivugut uagutsinnillu atuisinnaanerannik paasissutissinniartarlugit. Akeqanngilaq, uagutsinniillu isigalugu tamanut iluaqutissartaqarpoq, Jeppe Bülow Sørensen oqarpoq.
Hanne Husted Manata Aalborgip Kommuniani Meeqqanut Ilaqutariinnullu inmgerlatsivimmi pisortaavoq suliniullu ilassilluarlugu
Innuttaasutut maani najugallit arlallit assigiinngitsunik kulturimikkut oqaatsitigullu tunuliaqutaqarput, annermillu Aalborgip Kangiani kalaallit arlaqarput. Taamaammat sulianik suliaqartutsinnut ullut aalajangersimasumik qulequtsiilluni sammisaqarfiusut aamma paasissutissiiffiusut neqeroorutiginikuuagut, ilaatigut Kalaallit Meerartaat suleqatigalugit. Aaqqissuussinerit taamaattut ornigarneqarluartaqaat, arlalitsigullu utaqqisoqartarlutik, taamaammat pisariaqartitsineq ersarippoq.
Taamaammat aamma nuannaarutigaara siunnersuisartoqatigiit immikkut ilisimasaat kulturikkullu ikaariarfiliisinnaanerat periarfissarigatsigit. Neriuutigalugulu upperivara taamaaliornikkut ilaqutariinnik kalaallinik suleqateqarnermut pitsaanerulissasoq. Siunnersuisartut assersuutigalugu tikkuussisinnaapput, suliap allatut iliorluni paasiniaavigineqarnissaanik, imaluunniit sulianut atatillugu arlaannik maluginngisatsinnik takkuitsuugaqalersugut. Immaqa allatorluinnaq attaveqarniartussaavugut. Isumaqarlunga taamaattut ataatsimoorluta ilisimasaqarfiginerulersinnaallutigit.
Sulianik Suliaqarneq Pitsaanerusoq paasissutissat annertunerusut uaniipput