Meeqqanut inuusuttunullu Kalaallit Nunaat pitsaanerusoq
Allattoq: Thomas ’Tyt’ Mogensen, Kalaallit Meerartaanni siulittaasoq
Meerartatta inuusuttattalu pitsaasunik atugassaqarnissaat Kalaallit Nunaannut pingaaruteqarluinnarpoq. Inuiaqatigiit meeqqat qanitarisaanniittut meeqqat toqqissisimallutik peroriartornissaannut pitsaanerpaanillu siunissami periarfissaqarnissaannut pingaaruteqarluinnarput. Taamaammat partiit qineqqusaartullu tamaasa kaammattorpagut, sumiiffinni ataasiakkaani meeqqanut inuusuttunullu inuunerminni atugarlioqqajaasunut suliniutit qinersereernerup kingorna qanoq patajaallisarneqarsinnaanerat pingaartillugu isiginiaqqullugu.
Ataatsimooqatigiiffiit mikinerusut - nukissaqarfiulluartut
Sumiiffinni mikinerusuni inuiaqatigiit meeqqat inuusuttullu ingerlalluarnissaannut sunniuteqarluarsinnaanerannik arlalippassuartigut pitsaasunik ersarissunillu misilittagaqarpugut. Assersuutigalugu suliniutitta ’Ikioqatigiinnerup’ - sumiiffinni ataasiakkaani inersimasunik piumassuseqarluartunik suleqateqarnermik tunngaveqartup - ersarissumik takutippaa, ataatsimooqatigiiffiit qanittumiittut meeqqat inuusuttullu inuunerisa pitsaassusaasa qaffatsinnissaannut qanoq nukissaqarluartigisartut.
Tamatumunnga atatillugu pingaartuuvoq, nuna tamakkerlugu isumaginninnikkut suliniuteqarnermi, suliniutit sumiiffinni ataasiakkaani ingerlanneqarsinnaanissaannik tamatigut aallaaveqartarnissaq. Taamaammat inatsisiliortartunut kaammattuutigaarput, tamatigut eqqarsaatigisaqqullugu, nuna tamakkerlugu suliniutit piviusorpalaartuunersut sumiiffinnilu ataasiakkaani pissutsinut naleqqussagaanersut. Pingaaruteqarluinnarpoq politikkikkut aalajangiinerit meeqqanut inuusuttunullu pitsaanerpaamik iluaqutaasumik sumiiffinni ataasiakkaani piviusunngortinneqarsinnaanissaat. Upperivarput sumiiffinni ataasiakkaani ingerlatsisartut, ataavarsinnaasunik sunniuteqarluartunillu aaqqiissuteqarniarnermi, qitiusumik inissisimalersinnaasut.
Pitsaaliuineq qitiutinneqartuarli
Meeqqanik illersuisoqartitsisarnerput ’Najorti’ aqqutigalugu, assersuutigalugu meeqqat angerlarsimaffimmik avataanut inissinneqartussanngortut, kommunimik naapeqateqarneranni illersuisoqartinneqartarput. Tamatumani ajoraluartumik illersuisartutta akuttunngitsumik naammattoortarpaat, meeqqat artornartorsiornerini pilertortumik iliuuseqartoqartannginnera. Isumaqarpugut pitsaanerusumik pitsaaliuilluni suliniuteqarnikkut, ajornartorsiutit ilaat - sumiginnaasoqarneranik angerlarsimaffiullu avataanut inissiinissamik suliassanngorsinnaasut – pinngitsoorneqarsinnaasut.
Taamaammat politikerit kaammattorumavagut qularnaaqqullugu kommunini sulianik suliaqartut – nunami sumiikkaluarunilluunniit – pitsaasumik tapersersorneqarlutillu ilitsersorneqartarnissaat. Kissaatiginartillugu takorluugarivarput suleqatigiilluartoqarnerunissaa, tassuunakkullu ilisimasat, misilittakkat nukissarisallu kommunit akimorlugit atorluarneqarsinnaalernissaat. Taamaaliornikkut inunnik isumaginninnikkut suliaqarneq patajaallisarsinnaavarput, isumagisinnaallugulu suliaq pillugu ilisimasat piginnaanerillu pisariaqartinneqarnerpaaffimminni iluaqutigineqarnissaat.
Ataatsimoorutta pitsaanerpaaq angussavarput
Kalaallit Meerartaanniit qularinngilarput, Kalaallit Nunaanni meeqqat inuusuuttullu tamaasa inuuneranni pitsaanerpaanik atugassaqartissagutsigit, sapinngisamik inuit amerlanerpaat peqataatittariaqarigut. Namminneq kajumissusertik naapertorlugu suliaqartut – tassalu annermik sumiiffinni ataasiakkaani peqatigiiffiit meeqqanik inuusuttunillu sullissisut – meeqqanik inuusuttunillu sullissinermi suliaqarnermillu peqataalluarnissaat qularnaarniarlugu aggersarnissaanni kommuni qitiusumik inissisimasinnaavoq, taamaalilluta ilisimasatsinnik, nukissarisatsinnik suliaqarnitsinnillu tapersiisinnaaniassagatta.
Siunissaq, Kalaallit Nunaanni meeqqat inuusuttullu ingerlalluarnissamut ineriartorluarnissamullu pitsaanerpaanik periarfissaqarfigisaat, pilersinniarlugu, tamatta – tassalu politikerit, sulisut, kattuffiit namminnerlu kajumissutsimikkut sulisut – suleqatigiinnissarput piffissanngorpoq.