Nalliuttorsiornermi meeqqat qitiutinneqarput
Qaammaterpassuarni piareersartoqareersoq Aarhusimi juunip aallaqqaataani, meeqqat ulluanni, ukiut 100-nngorlugit nalliuttorsiorneq malunnartinneqarpoq. Ulloq kalattoornermik, uaajeernermik, oqalugiarnernik, mamartunik nereqatigiinnermik, nipilersortunik nuannersunik meeqqanullu sammisaqartitsinernik sammisaqarfiuvoq.
Grønlandske Børn – Kalaallit Meerartaat DGI-Husetimi arfininngornermi juunip aallaqqaataani ilaqutariippassuarnut suliniaqatigiiffimmilu kajumissutsiminnik sulisorpassuarnut nunamit tamarmeersunut nalliuttorsiortitsivoq. Meeqqat, inuusuttut, angajoqqaat kajumissutsiminnillu sulisut 400-nit amerlanerusut peqataapput ullorlu nuannerluinnartunngortillugu.
”Kalaallit meerartaasa, inuusuttortaasa ilaqutariillu tapersersorneqarnissaminnik pisariaqartitsisut inuuniarnermikkut atugarissaarnissaannik anguniagaqarluta ukiuni 100-ni suliniuteqarpugut. Taamaattumillu nuannaarutigaarput taama amerlatigisut ullumikkut arfininngornermi nalliuttorsioqatigiumalluta takkussimammata. Ataatsimooqatigiinneq nukittooq, meeqqanut inersimasunullu tamanut inissaqartitsisoq, pingaaruteqartupilussuuvoq, Puk Draiby, Kalaallit Meerartaanni generalsekretærini oqaluttuarpoq.
Ataatsimooqatigiinneq ineriartornartoq pisariaqartinneqarpoq
Nalliuttorsiorluni nuannatsitsinermi ilaqutariit kalaallit nunamit tamarmeersut katersuupput, kalaallisut nipilersortoqarpoq, kalattoortoqarluni, springsalimi pinnguartoqarluni ataatsimuualaarnissamullu piffissaqarluarluni. Aarhusimi meeqqaanut inuusuttunullu rådmandi Thomas Medom Hansen oqalugiarpoq ataatsimooqatigiinnerillu aamma Kalaallit Meerartaasa suliniuteqarnerisa pingaaruteqassusiat eqqartorpaa, aamma Aaja Chemnitz (IA) ullormi najuussinnaanngitsoq Nuumminngaanniit inuulluaqqussuteqarpoq. Ataatsimut isigalugu ulloq meeqqat, inuusuttut ilaqutariillu qitiutillugit sammisaqarfiuvoq.
”Nunamit tamarmeersut naapeqatigiinnerat nuanneqaaq. Nalinginnaasumik ilaqutariit najukkami inuiaqatigiinni inissilluarnissaannut tapersersorlugit suliniuteqartarpugut, tamattaallutali katersuukkaangatta ataatsimooqatigiinnerup tamanut qanoq pingaaruteqartiginera ersarilluinnartarpoq. Oqaloqatigiillunilu pinnguaqatigiittoqarpoq, aamma meeqqat inuusuttullu ukiorpassuarni ilisarisimasagut takkupput inuunertillu qanoq ineriartorsimanersoq oqaluttuaralugu”, Puk Draiby oqarpoq.
