Kikkut tamarmik tulluusimaarutissaqarput
Josef Tarrak kalaaliuvoq rappertartoq kinguaariinnullu kalaallinut inuusuttunut maligassiuisuulluni.
Iluatsilluarnermut arlalitsigut assersuutaalluarpoq. Namminerli oqaaseq iluatsilluarneq atussallugu nuannarinngilaa. Oqaaseq tulluusimaarneq pitsaanerusoq, taanna isumaqarpoq. Kikkut tamarmik tulluusimaarutissaqarput.
Inuusuttut qilanaartut 15-it nipaallipput Josef Tarrak Aalborgimi kulturip illorsuanut Trekantenimut ullaap tungaani isermat. Nipaallineralli ammasumik oqaloqatigiinnermut saatsinneqapallappoq, inuunermi aqqutissap qanoq nassaarineqarsinnaanera, kinaassutsimillu tulluusimaarutiginninneq oqaluuserineqarlutik - aamma suut tamangajaasa akuerinissaat, naak killigisanik qaangiinerugaluartut suullu tamarmik ajutoorsinnaagaluartut.
Kukkussuteqarneq aamma aqqusaagassaavoq
”Isumaqarpunga periarfissat atorluarnissaat tamatigut pingaartittuarsimallugu. Aamma ingasattajaarpallaaraangama. 16-inik ukioqarlunga nipilersuusiorneq aallutilerpara. Aallaqqaammut soorunami sorpassuit saperpakka. Suut tamarmik nutaajupput, inuusuppallaarlungalu misilittagakitsuuvunga pilersaarummillu pigisaqarnanga - ammasuuvungali ingerlaannarlu iliuuseqartarlunga. Aap, kukkussuteqartarpunga, piffissalli ingerlanerani ima eqqarsartarnissaq ilikkarpara: Soormi? Ajornerpaaq suna pisinnaagami? Paasivara qanorluunniit kukkutigigaluaraanni sianiilliortigigaluarunilluunniit inuit puigortaraat. Sapaatit akunnialuit qaangiuppata soqutigineqarunnaassaaq. Taamatut eqqarsarneq kiffaanngissuseqarnerulersitsivoq”, Josef Tarrak oqaluttuarpoq.
UAGUT tassaavoq inuusuttunut kalaallinut ineriartortitsinermut aaqqissuussineq, inuusuttut inuttut inooqataanikkullu piginnaanerminnik nukittorsarfigisinnaasaat aammalu kissaatiminnik takorluukkaminnillu ersersitsinissaminnik - imminullu anguniagassinnissaminnik - suliaqarfigisinnaasaat. UAGUT Børnehjælpsdagen suleqatigalugu ingerlanneqarpoq Børnehjælpsdagenillu suliniutaata EMPOWER4U-p > DRØMMEJOB-ip ataaniilluni. Taanna inuusuttut inissinneqarsimasut siornatigullu inissinneqarsimasut inuunerminni ingerlariaqqinnissaannut aamma ilinniagaqarnissamut suliffissarsiornissamullu periarfissaqalernissaannut iluaqutaalluarsimavoq.
Inuusuttoqatit oqariartuutissaqartut misilittakkaminnik oqaluttuartinnissaannut UAGUT-mit qaaqqusarpagut. Rappertartip Josef Tarraap inuusuttut UAGUT-meersut Aalborgimi akunnialunni ataatsimooqatigai. Tassani ilaatigut periarfissat atorluartariaqarnerat eqqartorpaa, aamma killigisakkanik qaangiigaluarpata ingasakkaluarpataluunniit.
Misigivunga pissutsit nipituuliutiginissaannut pisussaaffeqarlunga
Josefip nalunngilaa inuusuttorpassuarnit iluatsitsilluartutut isigineqartarluni, allalli iluatsitsilluartarnerisa tunuaniippoq allatulli inuinnaq, nalornisinnaasoq aamma ullulussinnaasartoq.
” Ima oqarfigineqarsinnaasarpunga: “Hey, iluatsitsilluarputit, aamma aap, soqutigineqarpunga nipilersukkanillu saqqummersitsinikuullunga, aammali nalornisarpunga sorpassuillu aamma iluatsinngitsoortarpakka”, Josef oqaluttuarpoq.
Josef inuusunnerugallarami Nuummilu peroriartorluni ullut nuanniitsut initungaatsiartarsimapput:
”Anaanaga aalakoortartoq angajoqqaallu ataatsimiinnerinut tamatigut najuuttanngitsoq alliartorfigaara. Tamanna tulluusimaarutiginngilara, Prussicikkulli nipilersugaat tusarnaartalerakkit arlaannik pisoqarpoq. Ingammik erinarsugaasa ilaat sumiginnaanermut angajoqqaanullu tunngassuteqarpoq. Tassanilu siullerpaamik kisimiinnanga paasivara. Oqartoqarsinnaavoq suminngaanneerfinnik avatangiisimalu tulluusimaarutiginissaannik taakkua ilinniartikkaannga. Ullumikkut misigivunga pissutsit nipituuliutiginissaannut pisussaaffeqarlunga, amerlavallaammi asuli nipangersimaannartarput. Neriuppunga taamaalillunga meeqqat inuusuttullu uattut aqqusaagaqartut kisimiinnginnerminnik misigisimalersissinnaassallugit”.
Josef Tarrak maligassiuisutut imminut isiginngilaq:
”Oqanngilanga inuit inuusuttoqatikkalu allat uattut iliussasut. Tamattami assigiinngitsunik ilungersuuteqartarpugut. Kikkut tamarmik tulluusimaarutissaqarput. Assersuutigalugu uanga nammineq inissiartaarsimanera tulluusimaarutigaara. Angerlarsimaffeqarpunga nammineq pigisannik, piumagumalu tassaniiginnarsinnaavunga. Tamannalu tulluusimaarutigisarpara nuannaarutigalugulu”.
UAGUT pillugu uani paasisaqarnerusinnaavutit