Sumiiffinni ataasiakkaani ataatsimooqatigiiffinnut nukissat amerlanerit
Meeqqat inersimasullu 820-t Qeqertarsuarmi najugaqarput. 2025-mi suliniummut ’Ikioqatigiinnermut’ – maanna Kullorsuarmi Nanortalimmilu ingerlareersumut – peqataalernissamut periarfissaqalissapput. ’Ikioqatigiinneq’ tassaavoq sumiiffinni ataasiakkaani aallaavilimmik piffissami sivisunerusumi suliniut, tassanilu sumiiffinni ataasiakkaani namminneq kajumissutsimikkut sulisut sumiiffinnilu ataasiakkaani inuit ilinniarsimasut suleqatigalugit, najukkami meeqqatut ilaqutariittullu inuunnerup toqqissinartuullunilu pitsaasup pilersinnissaa anguniarparput. Tamanna pissaaq suliniutit sammisaqartitsinerillu assigiinngitsut, illoqarfimmi innuttaasut nammineq toqqagaralugillu inerisaaqataaffigisaat aqqutigalugit.
”Qeqertarsuup qanimut suleqatigilernera tamatta nuannaarutigeqaarput – annermillu qilanaarivarput illoqarfimmi inuit nukissaqarluartut maannangaaq meeqqanut inuusuttunullu allannguisuusunik suliaqareersut ilisarilernissaat. ’Ikioqatigiinneq’ aqqutigalugu taakkua suliaasa ikorfartornissaat periarfissaqarfigilissavarput, taamaalilluni amerlanerit ataatsimooqatigiiffinnik - soorlu peqatigiiffinnik ataatsimoorluniluunniit sammisassanik – iluaqutissarsisinnaaqqullugit,” taama oqaluttuarpoq Julie Lynge, Nuummi allattoqarfimmi pisortaasoq.
Sissat qernertunik siorallit – 2021-mi aasarsiortitsigatta aamma pinnguartarfittut atorneqartut - Qeqertarsuup tusaamaneqaataasa ilagaat. Aasarsiortitsinermi suleqatitaartorluarsimanigut nangillugit maanna meeqqanut inuusuttunullu periarfissanik amerlanernik ataatsimoorluta pilersitsissaagut.
Qeqertarsuaq tikinneqartarpoq Ilulissanut timmisartoriarluni, tassanngaanniit qulimiguulimmik angallammilluunniit ingerlaqqilluni. Tamatuma kinguneraa ilaqutariinnut angalaneq akisullunilu sivisusarmat – taamaammat aamma illoqarfik aasarsiortitsiffigeqqissavarput 2025-mi, tassanilu najukkami namminneq kajumissutsimikkut sulisut nunarsuarmillu tamarmeersut ataatsimoorlutik meeqqanut, inuusuttunut ilaqutariinnullu aasaanerani nuannersunik misigisassaqartitsissapput.