Aasaanerani tammaarsimaarneq – nunarsuarmiit tikerartut

Aasaq sivisunaarneqaraagat

Illoqarfeeqqani nunaqarfinnilu aasaq meeqqanit sivisunaarneqarsinnaasarpoq. Atuarfik, klubbi timersortarfillu nalinginnaasumik matoqqasarput, ikittuinnaallu aasaanerani sunngiffeqarnermi angalasinnaasarput. Taamaammat aasat tamaasa tammaarsimaartitsisarpugut, namminneq kajumissutsimikkut sulisut nunarsuarmit tamarmeersut sapaatip-akunnerini sisamani illoqarfinnut nunaqarfinnullu avinngarusimanerusunukaasarlutik, meeqqat inuusuttullu puigugassarinngisaannik aasarsiortikkiartorlugit. Pinnguaatit timersuutillu amerlasaqaat, alutornartunik nerisassiortoqartarluni nipilersortoqarlunilu, allamiut oqaasii tusarsaaqalutik nutaanillu pinnguaqatitaartortoqartarluni. Sapaatip-akunnerini tammaarsimaarnerit ingerlanneqarfiini, illoqarfimmi oqaatsit assigiinngitsut tusarsaasaqaat sammisassarpassuaqarlunilu, kulturillu naapinnerat meeqqat, namminneq kajumissutsiminnik sulisut najukkamilu inuit suliumatuut peqataaffigilluartarpaat.

Naliliinerit takutippaat, meeqqat nutaanik ilinniagaqarumalluartartut, nutaanik ikinngutitaartortartut oqaatsinillu piginnaasaat malunnaatilimmik pitsanngoriartartut. Tammaarsimaarnerit aammattaaq ukiut, atuarfimmi klassimmi sorlermiinnerit assigiinngiffiillu allat apeqqutaatinnagit ataatsimooqatigiiffinnik pilersitsisarput ataatsimooqatigiinnerlu meeqqat atualeqqinnerminni iluaqutigisinnaasaat patajaallisarneqartarluni.

Kalaallit Nunaanni aasaanerani tammaarsimaartitsisarnerit ingerlanneqartarput kommunit, ulluunerani neqeroorutit, meeqqanut inuusuttunullu klubbit najukkamilu innuttaasut qanimut suleqatigalugit, ukiullu tamaasa aningaasaateqarfinnit, kattuffinnit suliffeqarfinnillu assigiinngitsunit tapiiffigineqartarlutik. 2021-mi aasaanerani tammaarsimaartitsineq ukunannga tapiiffigineqarpoq: Kommune Qeqertalik  Nunafondenimit taperserneqarluni, Avannaata Kommunia, Tipsernermit Lottornermillu aningaasaliissutaasartut, NAPA, Inuuneritta Puljen, Den Grønlandske Fond, KNI a/s, Royal Arctic Line allallu.