Siunissami ilaqutariit pillugit isumasioqatigiinneq: Inuiaqatigiit tamarmiusut suliassaraat
’Siunissami ilaqutariit – toqqissisimasut, eqqummaarissut asannittullu’, tassaavoq ataatsimeersuarnerup Nuummi 9. – 11. januar ingerlanneqartup qulequtaa.
Meeqqat inuusuttullu amerlavallaat angerlarsimaffimmik avataanut inissinneqartarput, meeqqat inuusuttullu amerlavallaat imminortarput, persuttaanermillu qanimut misigisaqartarlutik aamma meeqqat inuusuttullu amerlavallaat ilaqutariinni imigassamut attuumassuteqartunik ajornartorsiutilinni peroriartortarput. Tamakkuupput ataatsimeersuarnermut aallaaviusut. Ataatsimeersuarnerup siunertaraa, qitiusumik susassaqartut suliat akimorlugit siunissami ilaqutariit toqqissisimasut, eqeersimaartut asannittullu pilersinnissaannut atatsimoortumik sammivissinnissaat.
Siunissami ajornartorsiutit tamanit susassaqarfigineqarput
Meeqqanut, Inuusuttunut, Ilaqutariinnut Peqqissutsimullu Naalakkersuisoq Mimi Karlsen erseqqissumik oqariartuuteqarluni ataatsimeersuarnermik aallarniivoq: "Ilaqutariinni ajornartorsiutit namminerisamik ajornartorsiutitut isigineqarsinnaanngillat. Tamanut tunngasuupput, inuiaqatigiinnut annertuumik sunniuteqartartut.
”Piffissanngorpoq ajornartorsiutit sorlaannut ataatsimoorluta iliuuseqarnissarput, taamaalilluta inuiaqatigiit inerisarnissaannut pitsaasumik aalajaatsumillu toqqammavissiilluta. Aatsaat ajornartorsiutit ersersikkutsigit, qanoq annertutiginerat paasisinnaavarput - iliuuseqarlutalu”, naalakkersuisoq Mimi Karlsen oqarpoq.
Meeqqat pineqarput
Nuummi Kalaallit Meerartaanni allattoqarfimmi pisortap Julie Lynge-p – isumasioqatigiinnermut peqataasup - isumaqatigaa, ajornartorsiutit nutaamik isiginiartariaqarnerat. ”Ilaqutariit ajornartorsiutaat annertuumik tamanit susassaqarfigineqarput. Meeqqat pisariaqartitaat pisinnaatitaaffiilu siullertut illersugassaapput. Tamannalu uagut Kalaallit Nunaanni suliniaqatigiiffittut meeqqanik sullissisutut pilersinneqarsimanitsinnut pissutaavoq,” oqarpoq nanngillunilu:
”Pingaartuuvoq tamatta immitsinnut sanioqqutaarluta tamatta immikkut sammivilinnik suliaqannginnissarput. Inuinnaat meeqqallu pillugit suliniaqatigiiffiit piareersimapput suliassat assigiiaamik isumagineqarnissaat qularnaarniarlugu ataatsimoorluni aaqqiissutissanut peqataanissaminnut. Namminersorlutik Oqartussat kommunillu matu ammarlugu, ajornartorsiutit aaqqiiviginissaat pillugu oqaloqatigiinnissamut aggersaanissaminnut annertuumik akisussaaffeqarput. Neriuppunga peqataanitsigut, pimoorussamik suliassat ataatsimoorullugit suliarisalernissaannut, politikerit pisariaqartumik sunneeqataaffigisimallugit.”
Julie Lynge Nuummi Kalaallit Meerartaanni allattoqarfimmi pisortaavoq: ”Namminersorlutik Oqartussat kommunillu suleqattiginerunissaannut assagut isaappagut. Ataatsimoorluni aaqqiissutissat pisariaqartinneqarput”.