Kalaallit Meerartaanni inuit nutaat
Piffissami kingulliunerusumi Kalaallit Meerartaanni arlalinnik suleqatitaarnikuuvugut. Tamaasa assigiinnik aperivagut tulleriaarlugit Kalaallit Meerartaanni inuit nutaat -nik taallugu saqqummiussatsinni. Københavnimi allattoqarfimmi Joanna Absalonsen suliniutinut inerisaanermullu siunnersortitut atorfinippoq.
Sooq Kalaallit Meerartaanni atorfik qinnutigiviuk?
Atorfik qinnutigivara ukiuni arlalinni kalaallinut inuusuttunut suliniutut ilusilinnik suliaqarnissara takorloortuarsimagakku, kattuffinni assiginngitsuni sulinngiffinni suliarisarsimasattut.
Siusinnerusukkut suliffigisannit misilittakkat, suliat imaluunniit suliassat suut maanna atorfigilikkanni atorsinnaavigit?
Københavnip Kommuniani siusinnerusukkut ’Ungecenterimi’ suliffigisanni inuusuttunik 15-18-nik ukiulinnik ilinniartitsineq ilinniagaqalernissamullu ilitsersuineq suliarivara, tamatumunnga ilanngullugit kaammattuutaasumik oqaloqatigiinneq aamma ataatsimoortumik isiginneriaaseqarluni mentoreqartitsineq, inuusuttut ilinniagaqarnissamut suliffeqalernissamullu qanillinissaannik siunertaqartumik. Saniatigut Kalaallit Nunaanni Danmarkimilu suliniutinik aqutsinermik workshop-inillu aaqqissuussinermik misilittagaqarpunga.
Maanna atorfigilikkanni suliassatit pingaarnerit suuppat?
Kalaallit Meerataanni inuusuttunut suliniummi nutaami ’Uagut’-mi suliniummut pisortaavunga, taannalu ’Børnehjælpsdagen’ suleqatigalugu ingerlapparput. ’Uagut’ tassaavoq kalaallinut inuusuttunut imminnut inissinniapiloortunut suliniut annertusisamik ingerlatsiviusoq. Siunertaavoq inuusuttut nammineerlutik inersimasutut inuuneqalernissaannut tapersersornissaat. Suliassarivakka ataatsimiinnerit pilersaarusiornissaat, nammineq kajumissutsimikkut mentoriusussanik sulisussarsiornissaq peqataasussarsiornissarlu, ilinniartitsinermi atortussanik inerisaanissaq bootcamps-inilu sammisassanik suliaqarnissaq.
Suliartornissamut suut kaammattuutapat?
Uannut kajumissaataanersaavoq peqataasut peqatigalugit pitsaasunik allanngueqataanissaq, imaappoq piginnaasama sammisassanut pitsaasunut, ataatsimooqatigiiffinnik patajaatsunik pilersitseqataaffiusunut, ataatsimooqatigiinnermik pilersitsinermut siunissarlu pillugu periarfissanik nutaamik isiginnilersitsisunut atornissaat.
Kalaallit Meerartaanni sulilerninni suut qilanaarinerpaavigit?
Qilanaarinerpaavara inuusuttut suliniummut peqataasussat naapinnissaat, suleqatillu peqatigalugit inuusuttunik sammisaqartitsisarnissaq aamma nuannersunik misigisaqarnissaannut ineriartornissaannullu peqataanissaq.
Kalaallit Meerartaanni sulilerninni suut qilanaarinerpaavigit?
Oqaatsitigut unammilligassaqassangunarpunga. Kalaallisut oqaatsit oqariaatsillu pingaarnerit nalunngilakka, annertunerusumilli oqaatsit ilinniarusullugit. Taamaammat januaarimi kalaallisut ilinnialernissara qilanaarivara.
Kalaallit Nunaanni nalliuttunit ullunilluunniit nalliussisakkanit suna nuannarinerpaaviuk?
Ullortunermi juunip 21-ni Inuiattut Ullorsiortarneq, Erfalasutta nivinngarneqartarnera ullormilu tassani Kalaallit Nunaanni Danmarkimilu nuannersunik assigiinngitsunik sammisaqartarnerit.