Kalaallit Meerartaanni inuit nutaat
Piffissami kingulliunerusumi Kalaallit Meerartaanni arlalinnik suleqatitaarnikuuvugut. Tamaasa assigiinnik aperivagut tulleriaarlugit Kalaallit Meerartaanni inuit nutaat -nik taallugu saqqummiussatsinni. Nuummi allattoqarfimmi Rikke Louise Kuhn Suliniutinut Inerisaanermullu siunnersortitut atorfinippoq.
Sooq Kalaallit Meerartaanni atorfik qinnutigiviuk?
Siusinnerusukkut atorfigisanni Kalaallit Meerartaanni sulisut ilaat suleqatigilluartarpakka. Ukiut ingerlanerini Kalaallit Meerartaasa suliarisarsimasaat alutorivakka.Taamaammat atorfik inuttassarsiorneqartoq takugakku: Tassa atorfik takorloortuartagara!
Meeqqanut, inuusuttunut, ilaqutariinnut attaveqaatitullu qanitaannut pitsaasumik allannguinissaq soqutigisarilluinnarpara. Najugaqarfigisami inuiaqatigiinni ataatsimooqatigiiffinnik patajaatsunik peqataatitsiffiusunik pilersitsinissaq pingaaruteqaqaaq tassuunakkullu pitsaasunik allannguilluni.
Siusinnerusukkut suliffigisannit misilittakkat, suliat imaluunniit suliassat suut maanna atorfigilikkanni atorsinnaavigit?
Juumuutut ilinniagaqarpunga, juumuutullu sulinerma annersaani Kalaallit Nunaanni sulillunga. Sisimiuni Maniitsumilu najugaqarnikuuvunga, ukiullu 12-it affarlu kingulliit maani Nuummi najugaqarlunga. 2006-miilli pitsaaliuinermik – tamatigoortumi isigalugu - suliaqarpunga. Ilaatigut juumuutut, MANU-mi inerisaanermut siunnersortitut/suliamik aqutsisutut naggataatigullu Paarisami sulianut pisortatut. Arlalinnik ilinnagaqaqqinnikuuvunga, ilaatigut coachitut, meeraaqqat pillugit siunnersortitut, supervisoritut aamma naalungiarsunnik katsorsaasartutut.
Angajoqqaat atugarliortut Katsorsaavimmi meerartaarnissamut piareernissaannik/MANU-mik ilinniartittarnikuuakka. Ilaqutariinnut atugarliortunut siusissukkut suliniuteqarnermik, kinguaassiuutitigut peqqissuunissamik aamma inuusamik suliniummik suliaqarnikuuvunga.
MANU-mi siuttuullungalu inerisaanikuuvunga, taannalu tassaavoq ataatsimoortumik isiginneriaaseqarluni, nuna tamakkerlugu atuuttumik inersimasunillu ilinniartitseriaatsit atorlugit angajoqqaanut, angajoqqaarsianut meeravissiartaartunullu tamanut neqeroorut. Tamanna assut tulluusimaarutigivara eqqarsarpungalu aamma suliniutitsinni nutaami ’Ikioqatigiinnermi’ aamma atorsinnaasoq.
Suliartornissamut suut kaammattuutaappat?
Kajumissuseqalissutigisarpara ullaat tamaasa iteraangama qilanaarisannik suliffeqarnera. Nikerartunik suliaqarnissara pingaartuuvoq, tamatuma ulloq suliffiusoq pissanganarnerulersittarmagu. Nuummi allattoqarfipput angisuujunngimmat, assigiinngitsunik suliaqarsinnaasariaqarpugut. Taamaaliornikkut immitsinnut ikioqatigiillutalu tapersersoqatigiissinnaasarpugut. Suleqateqarluarneq pingaarnersaavoq. Taamaanneralu malugisinnaalereerpara.
Kalaallit Meerartaanni sulilerninni suut qilanaarinerpaavigit?
NGO-mi sulinissaq aamma meeqqat inuusuttullu atugarliortut ilaqutaasalu ikiorsinnaanissaat.
… suut unammilligassarivigit?
Kissaatigigaluarpara ullaat arlaanni itissallunga kalaallisut kukkuneqanngitsumik oqalulersinnaalersimallunga. Kalaallisut ilikkanngitsoornera uanni assut inituvoq, taamaattorli annertuumik kalaallisut paasisarpunga. Kisianni aamma unamminartoq tamanna pitsaasumut saatinneqarsinnaavoq.
Kalaallit Nunaanni nalliuttunit ullunilluunniit nalliussisakkanit suna nuannarinerpaaviuk?
Decemberip qaammataa nuannarisaqaara, amerlanertigummi allaaqqittaqaaq arsarneqarlunilu, Nuummilu angerlarsimaffippassuarni juullip ulloriai igalaaniittut qaammarsaaqataasarlutik. Jyllandip kujataani peroriartornikuuvunga. Ilaqutatsinni ileqquuvoq Kunngit Pingasut Ulluata tungaanut orpeqartarneq. Nalunngisama suli ukiutoqarianngitsoq orpeeruttarnerat eqqumiigikujunnikuuara. Maanili Kalaallit Nunaanni misigisarpara amerlanerit Kunngit Pingasut Ulluat ilanngullugu orpeqarlutillu igalaani juullip ulloriai ikumatittaraat. Ileqqorlu tamanna uigalu meeqqatsinnut ingerlateqqipparput.