”Sapiimmi inuusuttut imminnut eqqortunik aalajangiisarnissaannut piareersassavagut”.
Nuka Larsenip 31-nik ukiullip eqqaamalluarpaa, 16-inik ukioqarluni imminut uppererpiarani siunissaq pillugu nalornineq qanoq ittuunersoq. Kisianni uanga angerlarsimaffinni tapersersorneqarluarpunga, angajoqqaamalu toqqaaniarninni ikorfartorluarpaannga. ”Tamannalu meeqqat inuusuttullu amerlaqisut, Qaqortumi meeqqat angerlarsimaffianni Akillerni kiisalu Nuummi Niuernermik Ilinniarfimmi ilinniartitsisuuninni naapitama uangalu assigiinngissutigaarput, Nuka Larsen, Nuummi Kalaallit Meerartaasa allattoqarfianni suleqatitaarput, oqarpoq.
“Kalaallit inuusuttut ilinniagassaminnik toqqaanialeraangamik akimmiffissarpassuaqartarput”, Nuka Larsen oqarpoq.
“Kalaallit inuusuttut meeqqat atuarfiata kingorna ilinniagassaminnik toqqaaniarnerminni akimmiffissarpassuaqartarput. Arlallit toqqaanissaq ajornakusoortoq sapertarpaat”, Nuka Larsen oqarpoq. Nuka ’Sapiimmi’ – meeqqat atuarfianni atuartunut angajullernut ilinniarfissaminnik suliffissaminnilluunniit toqqaanissaminnut ikiorsertariaqartunut suliniummi - sulisussatut atorfinitsinneqaqqarmerrpoq. Nuka nassuiaavoq:
“Kalaallit Nunaanni ungasissutsit attaveqaateqarnikkullu ilutsit immikkut ittut pissutigalugit, takornartaanngilaq kalaallit inuusuttut ilinniariartorlutik kilometerit tuusintillit arlallit nuuttariaqartarnerat. Qaavatigut inuusuttut angerlarsimaffimminnit pisariaqartumik tapersersorneqanngikkunik, inuunermi aqqutigisassat toqqarnissaat inuusuttuaqqamut ajornakusoorsinnaasaqaaq. Taamaammat takorluukkat piviusunngortinniassagaanni sapiissuseqarlunilu nukissaqartariaqarpoq, inuusuttullu arlalissuit, unamminartut kisimiilluni ilaquttallu pulaarsinnaanagit sumiiffimmi nutaamiinnerup nassatarisartagaasa akiornissaat piareersimaffigisanngilaat”, Nuka oqarpoq, nalilerlugulu aammattaaq qallunaat oqaasii arlalinnut aporfiusartut.
Amerlasuut katataasarput
“Ilinniarfinni ilinniartitsisut amerlanerit qallunaatut oqaaseqartuusarput, illoqarfinnilu mikinerusuni inuusuttut nalinginnaasumik qallunaatut piginnaaneqarpiartaratik.Tamatuma kingunerisarpaa arlallit sivitsunngitsoq katataasarnerat, inuusuttullu ilinniakkaminnik taamaatitsiinnartarput”, Nuka oqaluttuarpoq, Sapiimmilu suliassami aallartinnissaanut qilanaarluni.
“Sapiimmi maannakkorpiaq suliassama pingaarnersaraat inuusuttut peqataanissaannut kaammattornissaat. Sapiimmut peqataaneq nuannersuullunilu pissanganartuussaaq, inuusuttullu attaveqatigiiffimmut imminnut tapersersoqatigiillutillu maligassiuisunik naapitsiffigisinnaasaminnut ilaalernertik misigissavaat. Kikkulluunniit tapersersorneqarnissartik pisariaqartittarpaat. Sapiimmi inuusuttut imminnut eqqortunik aalajangiisarnissaannut piareersassavagut”, Nuka Larsen oqarpoq.
Sapiiimmi inooqatigiissutsikkut sammisassaqartarpoq, inuusuttut arlalitsigut inuttut sakkussiffigisaannik, inuunerminni akimmiffiusinnaasunik unamminartunillu nalaataqarnerminni atorsinnaasaminnik. Aammattaaq Kalaallit Nunaanni inuussutissarsiutinik ingerlatsisut qanimut suleqatiginerisa kingunerivaat, inuusuttut Sapiimmi peqataasut suliffeqarfinnut assigiinngitsunut pulaarsinnaanerat. Ukiut qulit ingerlaneranni inuusuttut 1.000-inik Sapiimmut peqataanikuupput, misilittakkattalu takutippaat, neqeroorutip inuusuttut ataasiakkaat imminnut tatiginerulernerat nassatarisaraa inuusuttullu imminnut ataqatigiinnerat annertusartarlugu – tamannalu atuarfimmi pissarsiaqarnerannut sunniuttarpoq.
Sapiik Nuummi, Qaqortumi Maniitsumilu neqeroorutaavoq, Dansk Tennis Fondimit, Ole Kirk’s Fondimit, Erik Thunes Legatimit, Fondation Juchumimit aamma Hurtigruten Foundationimit tapiiffigineqartarluni, kiisalu aamma Ilinniartitaanermut, Kultureqarnermut Ilageeqarnermullu Naalakkersuisoqarfimmi Tipsernermit Lottornermillu aningaasaliissutinit pulje C-mit Qeqqatalu Kommunianit taperneqartarluni.