Naammaleqaaq!
Inuusuttut akornanni persutaanerit nalunaarutigineqartut 2019-imiit 2020-mut marloriaammik amerleriarput. Tamanna arlalinnik pissuteqartumik annilaarnarpoq. Persuttaaneq tamatigut ataatsimik amerlanernilluunniit eqquisarpoq, inuiaqatigiittullu eqqugaasut illersugassarivagut, kisianni aamma pisariaqarpoq persuttaasartunik eqqumaffiginninnissarput. Tassami sooruna inuusuttut amerliartortut persuttaasarlutillu saassussisalersut? Aatsaat misissuisumik pissuseqarfigigutsigu, oqallisiginissaalu sapiissuseqarfigalugu, taama pisoqarnerata illuanut saatinnissaa anguniarlugu qanoq iliortoqarsinnaanersoq ilisimasaqarfiginerulersinnaavarput. Tassami PINNGITSOORANI illuatungaanut saatitsilluni allannguisoqartariaqarpoq.
Allattoq: Heidi Lindholm, tarnip pissusiinik ilisimasalik aamma Kalaallit Meerartaanni siulittaasoq
Pissusilersorneq sunaluunniit tassaavoq attaveqaqatigiinneq. Persuttaaneq tassaavoq ajoqusiisumik pissusilersorneq, kamak soriarsinnaajunnaaqqasutullu misigineq avatangiiserisanut saqqummiunneqartarlutik. Persuttaasarnerit taama annertutigisumik annertuseriarmata, pissutissaqarpoq ilimagissallugu, tamatuma annertoqataanik meeqqat inuusuttullu akornanni kamaqartoqarlunilu soriarsinnaajunnaartitaasutut misigisimasoqartoq. Kamak soriarsinnaajunnaartutullu misigineq tamanna pimoorulluinnartariaqarpoq. Tarnip pissusiinik ilisimasalittut sulininni meeqqat inuusuttullu peroriartornerminni sumiginnagaasutut kiserliortutullu misigisarsimasut oqaloqatigikkajuttarpakka. Takuneqartanngitsutut tusaaniarneqanngitsutullu misigisarsimapput, immaqalu inersimasunik meeqqat pisariaqartitaannik isiginninninngitsunik sinnilimmillu nukissaqanngitsunik avatangiiseqarsimapput, - amerlavallaat angerlarsimaffimminni persuttaanernik misigisaqartarnikuupput. Inuusuttut akornanni persuttaasarnerup kisitsisitigut annertusiartornerata saniatigut aamma, angerlarsimaffimmi eqqissiviilliortarnerit – meeqqanit najuuffigineqartut - amerliartorput, taamaalilluni meeqqat inuusuttullu amerliartortut angerlarsimaffimminni persuttaasarnernik misigisaqartarput. Tamatumunnga attuumassuteqartoqarnera ilimagissallugu pissutissaqarluarpoq. Persuttaasarneq ajornartorsiutaavoq kinguaariinni uteqattaarneqalersartoq. Tassami pissusilersuutit kingornuttarpagut, tamakkualu kipitikkuminaartarput.
Persuttaaneq inuttut attaveqaatitigut siammaanneqartarpoq
Persuttaasarnerup arlallit attaveqartarneranni atugassaasunut ilaanerata saniatigut, aamma persuttaasarneq inuusuttut mobiltelefoniinut arriitsumik pulajartuaarnikuuvoq. Persuttaannerit inuttut attaveqaatit aqqutigalugit siammaanneqartarput, tamatumalu kinguneraa, inuusuttut avatangiisini persuttaaffiusuniittanngikkaluit, persuttaanernik filmiliarineqarsimasunik takusaqartarnerat, inuttut tusagassiissutini aliikkutarisartakkamik allat assingannik. Tamanna alloriarneruvoq ernumnarluinnartoq, persuttaasarnerup nalinginnaasumik isigineqalernissaanut tapertaasinnaasoq. Persuttaanerullumi nalinginnaasunngorsarnera inuiqatigiinnut ulorianarluinnartuuvoq. Nalinginnaasutut akuerssaakkagut illikartinneqassapput. Nalinginnaasutullu akuersaakkagut annertuallaarujussuarmik illikartinneqareerput.Kisiannimi sukkut aallartissaagut? Sammivik qanoq iliorluta allanngortissavarput? Isumaqarpunga meeqqat inuusuttullu soriarsinnaajunnaaqqasutut misigineranni kamaqarfiinilu naaperiartariaqarigut.Meeqqat inuusuttullu misigissutsiminnik pissutsissaqarluartumik pisinnaatitaaffigalugulu misigisaminnik oqaasertaliinissaannik ilinniartittariaqarpagut. Misigissutsit oqaasinngorlugit saqqummiunneqarsinnaapput, persuttaaninngorteqinagit. Oqariartuutip tamatuma meeqqanut inuusuttunullu takutinnissaa ataatsimoorluta akisussaaffigaarput. Oqaloqatigissavagut persuttaanerup inunnut qanoq sunniuteqartarnera pillugu, tamagitsinnut qanoq sunniuteqartarnersoq, aamma oqaloqatigiissutigissavarput persuttaaneq AKUERINEQANNGISAANNASSASOQ.
Persuttaasarnerup nipaatsumik akuersaarneqarnera
Oqaasinnguinnginneq kukkusumik paasineqarsinnaavoq tassaasoq, naapertuilluannginnermik sumiginnagaanermillu misigisimasaannik nipaatsumik akuersaaginnarneq. Amerlavallaat peroriartortarput misigisimanagu, misigisarsimasatik eqqortuunngitsut, aamma misigisimanagu sumiginnaaneq persuttaanerlu peroriartorfigissallugit meeqqamut ajoqutaasinnaasut. Tamatuma paasinissaa pissutsit unitsillugillu ineriartornerup illuanut saatinnissaanut tunngaviulluinnarpoq – aamma meeqqap inuusuttullu misigissusaasa akuersaarnissaat pinngitsoorneqarsinnaanngitsumik pingaaruteqarluinnartuuvoq.
Pissutsit illuatungaanut saatissagutsigit, amerlaqaagut sammivimmik ataatsimik sammiveqarluta suleqatigiittariaqartut - ataatsimoorluta. Suliassaq kisermaanneqarsinnaanngilaq. Taamaammat aamma nuannaarutigivara Kalaallit Meerartaat – Ilinniartitaanermut Aqutsisoqarfik, Isumaginninnermut Aqutsisoqarfik, Pinerlutsaaliuinermut Siunnersuisoqatigiit aamma nunami tamarmi meeqqat atuarfii suleqatigalugit – maannakkorpiaq atuartitsinermi atortussanik, inuusuttut akornanni persuttaasarnerup pitsaaliornissaanik annikillisarnissaanillu siunertaqartunik inerisaammata. Suliniut kisimiissinnaanngilaq, kisianni alloriarneruvoq pingaarutilik.Atuartitsinermi atortussat naapertuulluinnartumik taaguuteqarput TASSA! Kalaallit Nunaannilu meeqqat atuarfiini tamani klassini angajullerni atorneqalissallutik 2022-mi. Ukiumut ataasiarluni sapaatip-akunnera ataaseq atuartut skemaat nalinginnaasut atorunnaarsillugit, inuusuttuaqqat ilinniartinneqartassapput sungiusaatinillu tigussaasunik assigiinngitsunik ingerlatsisassallutik, taakkulu tamarmik siunertarissavaat persuttaasarnerup tununnissaanut periutsillu allat atornissaannut piginnaanngorsarnissaat. Susassaqartut taama amerlatigisut pissutsit illuatungaanut saatinniarlugit ataatsimoornerisa, aamma meeqqat inuusuttullu akornanni avatangiisit persuttaaffiunngitsut pilersinnissaannut akisussaaqataanerisa, persuttaasarnerit amerliartornerisa nassatarisaannik taarsiornermi qaamaneq ikippaat. Neriuppunga tamanna tassaassasoq innuttaasut aalassalernerannut aallarniutaassasoq, ataatsimoorussamik oqariartuutigineqaqqullugu: TASSA!/Naammaleqaaq!