Namminneq kajumissutsiminnik sulisut Camp West-ip kingorna: Meeqqat ataatsimooqatigiinnerlu pingaarnersaapput

Danmarkimi aasaq seqinnarimmiit kiattullu unnuaaniit ileqqumisut unerisimannginnerulersorlu namminneq kajumissutsiminnik sulinikut aqqaneq-marluk Københavnimut nunnipput. Ullualuit ataatsimooqatigiittussaapput, najugaqarfimminnut utinnginnerminni. Peqatigiiffik Kalaallit Meerartaat taakkua ilaannik Nørrebromi Balders Pladsimut qaaqqusisuuvoq, Paamiuni Camp West oqallisigiumallugu. ”Tamakkiisumik oqaasertaliinissaq ajornakusoorpoq, aammami aatsaat angerlamut apuuteqqammerpugut”, Ditte Egholm oqarpoq. Ditte-p qallunaat pingasut allat namminneq kajumissutsimikkut sulinikut issiaqatigai, qinnuigineqarpullu misigisamik pingaarnersaat oqaluttuareqqullugit. Sequnngiimivoq allaanani misigisani tamaasa oqaaseqatigiinnut ataatsinut eqikkarniarsarigai. Ditte 33-nik ukioqarpoq siusinnerusukkullu suliutigaluni tammaarsimaarnernut peqataasarsimalluni nammineq kajumissutsiminik suliaqarumalluni. ”Maannakkorpiaq ersarinnerpaat soorunami tassaapput meeqqat. Meeqqammi taakku ullut tamaasa ilagiuarpagut, taamaammallu tupinnanngitsumik ilikkarpagut arlallillu qanillilluinnarlugit. Aamma uagut nammineq kajumissutsimik sulisuusugut immitsinnut sungiulluinnarpugut, taamaammallu ullaaq misigisaq eqqumiikujuppoq - kisimiilluinnarluni. Meeqqat peqatigerat aamma nammineq kajumissitsuminnik sulisut allat ataatsimooqatiginerat maqaasinerpaasassaraakka”, Ditte oqarpoq. Tapersersuineq annertoqaaqAammattaaq Anne Kirstine nammineq kajumissutsiminnik suleqataasunut ilaavoq, isumaqarlunilu peqataaneq misigisaasoq annertooq pingaaruteqartorlu. Anne Kirstine oqaluttuarpoq: ”Illoqarfimmi ataatsimi sulillutalu najugaqaratta aamma Paamiut angiusoorsuunngimmat (inuit 1500-t miss., aaqq.) inuit ilikkalertorpagut. Arlaleriarluta naapitatsinnit uniffigineqartarpugut suliatta nuannaarutigineranik oqaluttuarumasunik. Brugsenimi sulisumiit isumaginnittoqarfimmi sulisunut suleqatigiumavaatigut. Assut tikilluaqqusaasutut misigisimavugut, allaanngilarlu illoqarfiup tamarmiulluni illoqarfimmi meeqqat nuannersumik tammaarsimaartinnissaat ataatsimoorukkaa”.Oqaatsit pingaarnersaanngillatMeeqqanik attaveqarnerup ilarujussua oqaatsinik atuerpianngikkaluarluni pisarpoq. Pernille oqaluttuarpoq: ”Eqqoriarpara meeqqat affaasa missaat qallunaatut oqalussinnaasut, kisianni sivitsunngitsoq meeqqanik attaveqarnerput pitsanngungaarmat ataatsimooqatigiinnitta ilarujussua oqaluppiartanngilagut. Taamaakkaluartoq meeqqat attavigillualerpagut”. Josefine nangippoq: ”Aamma tuluttut oqaluttoqangaatsiarpoq. Meeqqat ilaasa tuluit oqaasiinik sungiusarnissartik nuannarilluinnarpaat, ilaallu pikkoreqaat. Marlussuit tuluttuinnaq uagutsinnut saaffiginnittarput”. Camp West toqqissisimanarpoq nuannerluniluAtaatsimooqatigiinnermi peqataasut tamarmik isumaqatigiissutigaat Camp West meeqqanut sulisunullu misigisaasimasoq nuannersoq. ”Campi aallaaviuvoq pitsaasoq, meeqqat toqqissisimanartitaat ornissallugulu nuannarisaat. Meeqqat peqataasut ilarpassui susaqarpiaratik aqqusinermi aneerujuuinnartussaagaluarput, Ditte oqarpoq. ”Maannakkorpiaq qasoqqavugut, qaammat ataaseq akunnerpassuit sulinikuugatta, kisianni akunnerit taakku tamarmik pitsaasumik atorneqarput. Qularutissaanngitsumnik Camp West pissutigalugu Paamiuni meerarpassuit nuannerluinnartumik sunngiffeqalaarsinnaasimapput aasaaneranilu atuanngiffeqarluarlutik”.