MIO-mit nalunaarusiami nutaami inuusuttut: Kia akussavaatigut, kia takussavaatigut?
Meeqqat pisinnaatitaaffiinik sullissivik MIO imminortarneq pitsaaliorniarlugu nalunaarusiamik saqqummeeqqammerpoq. Nalunaarusiami inuusuttut ajornartorsiut pillugut isumaat aaqqiissutaasinnaasutullu siunnersuutaat aallaavigineqarput. ”Nalunaarusiaq tassaavoq imminortarneq pillugu oqallinnermut atatillugu saqqummiussaq sakkortooq. Nalunaarusiami inuusuttut oqaaseqartinneqarput, uagullu inersimasut tusarnaarnissaq akisussaaffigaarput” Nuummi Kalaallit Meerartaanni allattoqarfimmi pisortaq Julie Lynge oqarpoq.
Inuttussutsimut naleqqiullugu Kalaallit Nunaanni imminortartut amerlassusaat nunarsuarmi qaffasinnerpaat ilagaat, aliasungaarnernik kingunipilutsitsinernillu annertoqisunik nassataqartarluni. Ukiut 50-it sinnerlugit imminortartut amerlassusaat taamaanginnangajalluni qaffasittuarpoq, tamannalu sivisuumik politikkikkut eqeersimaarfigineqarlunilu annikillisarneqarnissaa anguniagaajuarpoq. ”Imminortarnermik pitsaaliuineq pillugu oqallinnermut atatillugu MIO-p nalunaarusiaa saqqummiussaavoq pingaaruteqarluinnartoq”, Nuummi Kalaallit Meerartaanni allattoqarfimmi pisortaq Julie Lynge oqarpoq. Imminortarneq pillugu oqallinnermi peqataasartut amerlaqaat, kisianni imminortarnermi ajornartorsiutit pillugit saaffigisat pineqartut ilarpassui – tassalu inuusuttut namminneq – annikitsuinnarmik isiginiarneqarnikuupput. MIO-p nalunaarusiaata inuusuttut tusarsaalersippai, uagullu tusarnaartariaqarpugut”, Julie Lynge erseqqissaavoq. ”Inuusuttut imminortarneq pineqartillugu immikkut eqqugaaqqajaapput. Inuusuttut amerlavallaat imminornissamik eqqarsaateqarneq misiginikuuaat, amerlavalaallu imminortoqarneratigut annaasaqarnikuupput. Taamaammat isiginneriaasiisa ilaatinnissaat pingaaruteqaqaaq. Taakku inuusuttuuneq eqqugaaqqajaanerlu aamma alianaqisumi inissisimaneq suusut nalunngilaat, nalunagulu ikiorserneqarnissaq qanoq ittoq pisariaqartinnerlugu”, Julie Lynge oqarpoq.
Aaqqiissutaasinnaasut arlallit inuusuttut tikkuarpaat
Suliniutaasinnaasut ilaattut inuusuttut nalunaarusiami tikkuarpaat inuusuttunut ornittakkat unnuakkut ammasartut, inuusuttut inuusuttoqatiminnik imigassartaqanngitsumik naapeqateqarfigisinnaasaat. Aammattaaq misigisassat sammisassallu nuannersut amerlanerit, inuusuttut inuusuttutut inuunerminnik pitsanngorsaataasinnaasutut tikkuagaasa ilaagaat. Inuusuttut nalunaarusiami kaammattuutigaat toqqissisimalluni ingerlalluarnermik pilersitsinissap tarnikkullu ikiueqqaarnissamut periarfissat pitsaanerusut isiginiarneqarnerunissaat. Ikiorneqassagunik sumut saaffiginnissinnaanissamik erseqqissarneqarnissaa pisariaqartippaat, akorneqarnissartik pisariaqartippaat, ikiorsiinerlu pilertortumik pisariaqarpoq. Aammattaaq inuusuttut ujartorpaat sumiiffinni ataasiakkaani qaammarsaasoqarnissaa pitsaaliuisoqarnissaalu, aamma marluinnaalluni oqaloqateqarsinnaasarnissaq ujartorpaat. Aamma ikinngutimik aliasuuteqartut imminornissaminnilluunniit eqqarsaateqartut oqaloqatiginissaannut sakkussaminnik ujartuipput.
MIO-p imminortarneq pitsaaliorniarlugu nalunaarusiaa inuiaqatigiinnik tamanik eqeersaasuuvoq. ”Eqqortumik pilaaritsi. Nakkarsaanneq taama, tassa naammaleqaaq!” Nalunaarusiami inuusuttoq taama oqarpoq, tassani aallaaviupput pitsaasumik allannguisoqarnissaanik imminortarnerillu pitsaaliornissaannik inuusuttut namminneq inassuteqaataat.
Nalunaarusiaq naapertorlugu oqaloqatigiinnerit artornartut aammattaaq tassaapput uagut inersimasut pikkorinnerulerfigisariaqakkatsitut inuusuttut isumaqarfigisaat. Julie Lynge oqarpoq: ”Annernarsinnaasut pillugit inuusuttortavut oqaloqatigisinnaasariaqarpagut. Tamanna tassaavoq inuusuttunik pimoorussinerit ilaat, kisimiinnginnerinillu takutitsinerulluni. Tamannalu atuuppoq uagutsinnut inersimasunut inuinnartut aammali oqartussaanermut atatillugu. Inuusuttut kissaatigaat sulianik suliaqariaaseq peqataatitsinerusoq, inersimasut tusarnaarnerusut aalajangiinernilu namminneq inuunerminnut tungasut peqataatitsisut. Oqariartuut pingaaruteqartuuvoq, uagullu pigiliuttariaqarparput”, Julie Lynge naggasiivoq.
