Igarsuarmut nerisassiorsinnaasumik pissarsiorpugut
”Nereqatigiinneq ilaqutariinnut caféqartitsisarnitta ilagaat pingaarutilik”, Kalaallit Meerartaanni meeqqanik ilaqutariinnillu ilitsersuisartoq Christina Edvardsen oqarpoq, Københavnimilu ilaqutariit kalaallit ukiumut arfinileriarluni katerisimaartittarnerinut namminerlu kajumissutsini naapertorlugu peqataasarusuttumik ujartuilluni. ”Pineqartoq nerisassiornermik nuannarisaqartuussaaq, pisiniarluni il.il. suliassanik ataqatigiissaarisinnaassalluni – igarsuarmullu nerisassiorsinnaasariaqarluni”.
Morten ullumi igaffimmiippoq. ”Næstvedimi najugaqarpunga, Ringstedimilu sulisarlunga, taamaammat ajoraluartumik tamatigut nerisassiortuusinnaanngilanga. Ukiumut ataasiarlunga takkuttarpunga. Nuannerluinnartuuvoq”, oqarpoq. Mortap qitornai Kalaallit Meerartaasa sapaatip-akunnerisa naanerini katerisimaartitsinerinut peqataasarnikuupput, ”maannali inersimasuupput”, Morten oqaluttuarpoq.
Sisamanngorneruvoq ilaqutariinnut caféqartitsiffissanngorluni. Sumiiffik tassaavoq Københavnimi Løvstræde-mi Kalaallit Illuutaat. Nalunaaqutaq tallimanut qiteqquppoq, inilu caféqartitsivissaq ulikkaalerpoq. Ilaqutariinnut caféeqartitsineq ilaqutariinnut kalaallinut Kalaallit Meerartaanni suliniutinut allanut attuumassuteqartunut naatsorsuussaavoq. Paarnat kaagillu nerriviup qaaniipput, meeqqallu teqeqqumi pinnguaqatigiipput pinngussanik saqqummiisimallutik.
”Ilaqutariinnut caféqartitsinermi nereqatigiinneq pingaaruteqartumik ilaavoq, Christina Edvardsen oqaluttuarpoq. ”Ilaqutariit takkuttarput ataatsimooqatigiinniarlutik, katerisimaarnertik kalaallisullu pissusilersorsinnaanertik nuannisaatigisarpaat, aammattaarlu ualeq unnullu taanna niuerniartariaqanngillat nerisassiortariaqaratillu. Tamanna aningaasaqarnikkut tigussaanerusutigullu oqilisaaneruvoq, ilaqutariinnut pingaaruteqartoq”.
Paornanguak ilaqutariinnut caféqartitsisoqarneri tamaasa takkuttarpoq. ”Kalaallinik allanik ilaqakulanngilanga, taamaammat maannarsinnaanera ilaqutariinnillu allanik ilaqarsinnaanera nuannarisaqaakka”. Aammattaaq paniata Navaranap meeqqanik kalaallinik allanik naapitaqarlunilu pinnguaqateqarsinnaanini nuannarisaqai ”Kalaalerpalaaq nuannareqaara”, oqarpoq.
Ilaqutariinnut kalaallinut allanngueqataarusuppit? Ukiumut arfinileriarlutit ulluinnarni nal. 15-21 missaani periarfissaqarpit? Igarsuarmullu inersimasut meeqqallu 40-t missaanniittut nerisassiuussinnaavigit? Taamaappat illit ujartorpatsigit naapinnissallu qilanaaralugu. Annertunerusunik paasisaqarumagaanni attavissaq: Christina Edvardsen, email: cte@fgb.dk //telefon: +45 2938 0781