”Meeqqat inuusuttullu tamatta akisussaaffigivagut”
Thomas ”Tyt” Mogensen Kalaallit Meerartaanni siulersuisuni nutaatut siulittaasunngorpoq. Thomas ”Tyt” Mogensenip CV-a takeqaaq. Pisortatut, aqutsisutut siunnersortitullu Kalaallit Nunaanni inuussutissarsiutinik ingerlatsinermit misilittagaqarpoq, aammattaarli siulersuisunut arlalinnut ilaasortaalluni, taakkununnga ilaallutik Kalaallit Meerartaat, 2016-imiilli ilaaffigisai – maannalu siulittaasuuffigiligai.
”Inuusussutissarsiutinik ingerlatsinermi pisortatut, sulisussaqarniarnermi ajornartorsiutit nalunngilluarpakka, misigisarnikuullugillu inuit ajornartorsiutinik nammataqarpallaarnertik pissutigalugu sulisinnaanngitsut. Aamma inuusuttut amerlavallaat ilinniakkaminnik unitsitsiinnartut misigisarpagut.Tamanna illuanut saatittariaqarparput”, Thomas ”Tyt” Mogensen oqarpoq, isumaqarporlu meeqqat isumaginissaat, nukittuujullutillu nunarsuarmi innuttaaqataalerlutik peroriartornissaat oqartussaasut kisimik akisussaaffigisussaanngikkaat. ”Tamanna aamma innuttaasut ataasiakkaat suliassaraat – minnerunngitsumillu inuussutissarsiutinik ingerlatsisut”, Thomas ”Tyt” Mogensen oqarpoq, isumaqarlunilu meeqqanut tunngasut aningaasalersornissaat kisimi suliassaanngitsoq.
”Aamma pisariaqartipparput inuussutissarsiutinik ingerlatsisut inuusuttunut saaffiginnittarnissaat aqqutissaannillu ilitsersuullugit siunnersortitut inissinnermikkut. Annertuumik allanngueqataasinnaavugut inuusuttut upperinerisigut iluatsitsinissaannullu naammattunik periarfissillugit. Taamaaliorsinnaavugut inuusssutissarsiornermi pisortatut, sallerpaatillugulu inuttut. Kalaallit Meerartaanni tusartuartarparput, inuit immikkut ittut meeqqap inuusuttulluunniit allamut saanneranut pissutaasarsimasut. Tamatta anguniartariaqarparput tassaalernissarput inuk immikkut ittoq”, Thomas ”Tyt” Mogensen oqarpoq.
Kattuffiit Kalaallit Meerartaasut ittut namminersortullu akornanni attavigiilernerup pilersinnissaata saniatigut Thomas ”Tyt” Mogensenip sulissutigerusuppaa: ”Inooqatigiissutsikkut kingornuttakkat Kalaallit Nunaanni meeqqanut inuusuttunullu amerlasuunut artornartut kipitittariaqarpagut. Meeqqat amerlavallaat angerlarsimaffimminni persuttaasoqartarnera atornerluisoqarneralu peroriartuutigisarpaat. Tamanna kinguaariinnut peroriartortunut arlalinnut kingunipiloqartarpoq. Meeqqat inuusuttullu angajoqqaaminnit pitsaanerusunik atugassaqartariaqarput. Tamannalu tassaavoq inuiaqatigiittut pingaarnerpaatillugu tamatta suliassarput. Uangalu Kalaallit Meerartaanni siulittaasutut tamatuma tungaanut annikikkaluamilluunniit tapeeqataasinnaaguma, suliara iluatsissimassaaq”, Thomas ”Tyt” Mogensen naggasiivoq.
Thomas ”Tyt” Mogensen 49-nik ukioqarpoq, Tyt Consultingimik piginnittuulluni, nuliaraalu Kathrine Bødker. Marlunnik erneqarput 16-inik 21-nillu ukiulinnik. Thomas ”Tyt” Mogensen Kalaallit Nunaanni 1985-imiilli najugaqarpoq.