Heidi Lindholm Kalaallit Meerartaanni siulittaasutut taamaatippoq
Heidi Lindholm Kalaallit Meerartaanni siulittaasutut tunuarpoq. Kalaallit Meerartaanni 24. maj ataatsimeersuareernerup kingorna siulersuisut inissitsiternissaasa tungaannut Andreas Hjort Frederiksen siulittaasuugallassaaq. Heidi Lindholm Meeqqanut, Inuusuttunut Ilaqutariinnullu Naalakkersuisoqarfimmi 1. maj 2022-miit pisortatut atorfinippoq.
Heidi Lindholm 2017-imi Kalaallit Meerartaanni siulersuisunut ilanngunnerminit 2020-milu siulittaasunngornerminiit annertuumik pingaaruteqarluni inissisimavoq. Minnerunngitsumik Københavnimi Nuummilu aqutsisunut pingaaruteqarluni isumasioqatigiuminartarpoq, Kalaallit Meerartaannilu 2025-mut periusissiap nutaap sammivissalersornerani peqataalluarluni.
Kalaallit Meerartaanni sulineq pillugu Heidi Lindholm nammineq oqarpoq:
”Kalaallit Meerartaanni annertuumik isiginiarneqarput, ulluinnarni atugarliorfiusuni unammillernartunilu nuannaarnermik anersaartorfissaqalaarnissamillu pisariaqartitsinerpaanut ataatsimooqatigiiffinnik nukittuunik pitsaasunillu pilersitsinissaq. Matumani pingaartuuvoq meeqqat inuusuttullu upperineqarnerinik takutitsiviginissaat aamma pingaaruteqarlutillu nukissamikkut sillimateqartuunerisa takutinnissaat. Taamatut meeqqanik inuusuttunillu patajaallisaaneq naleqartitaavoq annertuumik pingaarutilik, Naalakkersuisoqarfimmut nassarumaagara”.
Kalaallit Meerartaasa illersorteqartitsisarnerat ”Najorti” Heidip aamma immikkut pingaartippaa: ”Najorti tassaavoq meeqqat pisinnaatiitaaffiinik pimoorussineq, meeqqat isumaginninnikkut suliani imminnut tunngasuni tusaaniarneqarnissaannik isumaginniffiusoq, aalajangiinerit meeqqat qulaatiinnarlugit pisaqqunagit. Tamanna aaqqissuussineruvoq kommuninit ilassilluarneqartoq, neriuppungalu suli siammaannerujumaartoq, meeqqat kikkulluunniit isumaginninnikkut suliamut akuulersut illersortimik najorteqarnissaat periarfissaqaleqqullugu”.
Meeqqanut, Inuusuttunut Ilaqutariinnullu Naalakkersuisoqarfimmi pisortatut Heidi Lindholmip inissisimanera allaanerulissaaq, kisianni tarnip pissusaanik ilisimasalittut ilisimasani Heidip atorluassavai, taamatullu Kalaallit Meerartaannit sulinerminit misilittakkani: ”Isumaqarpunga inuinnaat kattuffiisa ilaanut Kalaallit Meerartaattut ittumut peqataasimaneq nukittoqutaasoq. Tamanna iluaqutissatut isigivara, qujanartumillu inuinnaat kattuffii Naalakkersuisullu akornanni suleqatigiilluartoqarpoq, Lindholm oqarpoq. Suliap tamatuma ingerlateqqinnissaa qilanaarivara”.