Fjeldvejimi nukappiaqqat
Assilisat immikkut illuinnartut internetikkut niuerfitsinniilerput. ‘Fjeldvejimi nukappiaqqat’ tassaavoq assit atorlugit suliaq, Nuummi ulloq unnuarlu paaqqinniffimmi Kaassassummi meeqqat inuusuttullu inuunerannik oqaluttuartoq.
Oscar Scott Carl qallunaajuvoq assiliisoq, piviusulikkersaarluni assiliisartoq, meeraalluni ukiut pingasut Nuummiissimasoq. 2021-mi meeraaffimminut uterpoq, nammineq inuttut kissaatigigamiuk Nuummit eqqaamasami paasiniarnissaat, aammali meeqqanik sumiginnaasarneq pillugu kisitsisit, minnerunngitsumik danskit tusagassiuutaasigut saqqummiunneqartartut, tunuliaqutaat paaserusukkamiuk. Oscarip angalanermini ilaatigut Nuummi meeqqat angerlarsimaffiat Kaassassuk pulaarpaa.
”Isumaqarpunga isiginneriaatsit nikerarnerusut - meeqqat sumiginnagaasut pillugit oqaluttuartoqaraangat ilaatinneqanngitsoortartut – ilanngunneqarnissaat pisariaqartillugu. Qularuutissaanngilaq meeqqat taakku imaannaanngitsunik misigisaqartarsimasut, kisianni tulleriiaanngorlugit assilisakka, Fjeldvejimi nukappiaqqat’-nik taaguuteqalersut, tassaapput assit, meeqqat inuusuttullu inuunerannik oqaluttuartut, tassani ulluinnarni suliassat pisussaaffiillu isumagineqartarput, assilli aamma tassaapput nukapiaqqat immikkut ittumik imminnut ataqatigiinnerannik oqaluttuartut. Inuttut oqimaaqisunik atugaqarsimaneq kisiat nassatarinngilaat. Aamma tassaapput nukapiaqqat nalinginnaalluinnartut, meeqqatulli allatut pinnguartartut. Pinnguarlutik paasuusaartartut. Nalunaaquttap-akunneri eqqamaffitik tamaasa Iphone-lerisinnaasut. Aamma pannakaanik mamarisaqarluinnartut ".
Oscar Scott Carlip isumaa naapertorlugu Fjeldvejimi nukappiaqqat tassaanngilaq oqaluttuaq naammassisaq tamaangalu killilik.
”Takorloorpara nukappiaqqat namminneq Fjeldvejimi nukappiaqqat kikkorpiaanerisa oqaluttuarinerat peqataaffigissagaat. Oqaluttuaq arlaatigut piginnittooqataaffiigilissagaat. Pilersaarutaavoq aningaasannanniarnissaq, tamarmik assiliissutitaarlutik namminneq assiliisarnissaat siunertaralugu. Immaqa namminneq assilisaat uanga assilisannit allarluinnaassapput. Tamanna qularutissaanngilaq. Takorluugaavoq ataatsimoorluta assilisatsinnik saqqummersitsinissarput”, Oscar Scott Carl naggasiivoq.
Fjeldvejimi nukappiaqqat assilisaapput tulleriiaanngorlugit suliat, assiliisumit Oscar Scott Carlimit pilersinneqartut. Assilisat tulleriaarlugit suliat taakku 2021-mi Danmarkimi Ukiup ingerlanerani ’Tusagassiuutinut Assilissap’ toqqarneqarnerani pitsaanerpaatut nersornaasigaapput.
Assit tulleriiaanngorlugit suliat tuniniarnerannit sinneqartoorutit tamarmik Kalaallit Meerartaasa meeqqat kalaallit tamarmik pitsaasumik toqqissisimasumillu inuuneqarnissaat siunertaralugu suliniutaannut ilanngarneqaratik nakkartinneqassapput.
’Fjeldvejimi nukappiaqqat’ pisiarisinnaavat uani