Toqqissisimanartumik ataatsimooqatigiiffimmi ineriartorneq
’Uagut’ taaguutaavoq junimi aasaanerani atuanngiffik sioqqutitsiarlugu kalaallit inuusuttut 26-t katerisimaaqatigiinnerannut naapertuulluinnartoq. ”Toqqissinartumik ataatsimooqatigiiffimmi tassani inuusuttut ataatsimoorlutik tamarmillu immikkut ineriartorput”, nammineq kajumissutsi naapertorlugu suleqatigiinni aqutsisoq Sara Johansen oqaluttuarpoq.
Aasaanerani atuanngiffik sioqqutitsiarlugu inuusuttut kalaallit 26-t sapiitsut sapaatip-akunnerani ataatsimi katerisimaaqatigiipput. Katerisimaaqatigiinneq ”UAGUT”-mut aallarnisaataavoq, taannalu taassaavoq ukiup ataatsip ingerlanerani arlaleriarluni katerisimaaqatigiinnertalimmik ingerlatsineq, malitseqartitsilluni ulluni sungiusarfiusunik ilaqartoq, tassungalu ataasumik mentoreqartitsiviusoq. UAGUT aallarnisarneqarpoq Børnehjælpsdagen suleqatigalugu, tamakkulu tamarmik siunertarivaat, inuusuttut kissaatigisaminnik takorluukkaminnillu oqaasertaliisinnaanngornissaannut tapersernissaat, imminnut anguniagassaliuussinnaalernissaat imminnullu naleqartunik toqqaanissaannut kaammattornissaat.
Inuusuttut ilagalugit aammattaaq suleqatigiinni aqutsisut coachillu arlallit peqataapput. Taakkua ilagaat Sara Johansen. Sara Johansen namminersortuulluni ilaqutariinnik siunnersuisartuuvoq, ulluinnarnilu ilaqutariinnut kalaallinut attuumassuteqarluarluni, annermik ilaqutariit meeraat angerlarsimaffimmik avataanut inissinneqartussatut suliarineqalersut imaluunniit, angerlarsimaffimmik avataanut inissitaasimasut. Ulluni arfinilinni katerisimaaqatigiinnerup ingerlanerani, Sara inuusuttunik tapersersuisutut kaammattuisutullu inissisimavoq.
Sara aamma Peter tamarmik immikkut inuusuttunut suleqatigiinnut arfinilinnut aqutsisuupput. “Eqimattakkaani eqimattakkaallu akornanni immitsinnut qanillilluinnarpugut”, Sara oqaluttuarpoq.
”Uagut” kalaallinut inuusuttunut suliniutitut ingerlatsinermut taaguutaavoq, ingerlatsineq Kalaallit Meerartaasa Børnehjælpsdagen suleqatigalugu aallarnisagaat, tamakkulu tamarmik siunertarivaat, inuusuttut kissaatigisaminnik takorluukkaminnillu oqaasertaliisinnaanngornissaannut tapersernissaat, imminnut anguniagassaliuussinnaalernissaat imminnullu naleqartunik toqqaanissaannut kaammattornissaat. ”UAGUT”-mi tunngavigineqarpoq Børnehjælpsdagenip suliniutaa EMPOWER4U > DRØMMEJOB, inuusuttunik angerlarsimaffimmik avataanut inissitaasunik imaluunniit inissitaanikuusinnarlutik angerlaqqissimasunik sunniuteqarluartumik inuuneranni piginnaasaqarlualersitsisartoq aamma ilinnigaqalernissaannut suliffeqalernissaannullu aqqutissiuussisartoq.
Inuusuttut ingerlatsinerup ingerlanerani ineriartorluartarput
”UAGUT allaaserilluagaavoq sammisassanullu assigiinngitsorpassuarnut ataqatigiissagaalluni, taamaakkaluartoq takorlooruminaappoq, misigisat qanoq ikkumaarnersut qanorpiarlu pisoqarumaarnersoq”, Sara oqaluttuarpoq, inuusuttullu ilarpassuisa allanngoriarneri tupaallaatiginerarlugit, nipaarlooqalutillu tunuarsimaarsinnaallutik peqataallualerlutik allaallu ilaat scene-mi sassarsinnaanngorlutik. ”Tamanna uppernarsisinnaallugu misigisaavoq annertooq, takorloorsinnaavaralu inuusuttunuttaaq misigisaasimassasoq annertooq. Ersarippoq imminnut upperilersut, neriunartumillu inuunerminni ingerlaqqinnerminni atorsinnaasaminnik saqqumilaarsinnaassuseqalersut.
Sarap ukiumi aggersumi inuusuttut malinnaaviginissaat qilanaarivaa. Katerisimaarnermi inuusuttut ilaatigut suliarivaat sulissutigiumasaminnik tigussaasunik anguniagassaliorneq. Tamanna ilaannut tassaasinnaavoq aalajangersimasumik ilinniagaqalernissaq, angajoqqaanut pitsaanerusumik attaveqalernissaq imaluunniit imminut upperinissaq. “Inuusuttut suleqatigiikkaartillugit sullippagut, suleqatigiinnilu aqutsisut inuusuttut qanillilluinnarpagut, taamaammat malinnaaviginissaat anguniakkaminnillu piviusunngortitsiniarnissaasa takunissaat qilaareqaara”.
”UAGUT” sapiissuseqalersitsillunilu iliuuseqarsinnaalersitsivoq
Kalaallit Meerartaanni allattaaneq Puk Draiby aammattaaq katerisimaaqatigiinnermi peqataavoq, upperilluinnarpaalu ”UAGUT” tassaalerumaartoq periuseq, ingerlatsereernerup kingorna kalaallinik inuusuttunik ingerlallualernissaannut periarfissarissaartitsinerulerlunilu nammineersitsinerulersinnaasoq.
”Børnehjælpsdagen peqatigalugu suliniup ”UAGUT” aallartinnissaa qilanaarinikooqaarput. Qularinngilarput ”UAGUT” Kalaallit Meerartaanni suliniutitsinnut allanut – pimoorussamik piffissamilu sivisunerusumi kalaallinik inuusuttunik tapersersuilluta, sapiissuseqalersitsilluta iliuuseqarsinnaalersitsilluta suliniutigisatsinnut - tapertaalluassasoq, anguniagassaliornissaannik tapersiinitsigut, atuarfimmiit inuusuttutut ilinniakkanut inersimasutullu inuunermut patajaannerusumik ikaarsaariarsinnaalersillugit”.
