Najortimi ataqatiigiissaarisoq nutaaq: Line-p meeqqat pisinnaatitaaffii sorsuutigai

Meeqqat isumaginninnermi sulianut ilaalersut kiserliortutut misigisaqaat. Tamanna Line-p ilisimalluarpaa, tassami siusinnerusukkut politiini sulinermini, meeqqat kinguaassiuutitigut atornerlugaallutillu sumiginnagaasimasut arlaleriaqaluni oqaloqatigisarnikuuai. ”Meeqqanut taakkununnga naammattumik iliuuseqarsinnaanngitsutut misigineq saneqqukkuminaappoq”, Line Thomsen oqarpoq, qilanaarlunilu Najorti aqqutigalugu iliuuseqarnissamut allanik periarfissaqalissagami.”Najortmi meeraq illersorparput, suliassattalu pingaarnersaraat meeqqamut toqqissisimanermik ersarissutsimillu pilersitsinissaq. Meeqqamut pisortanullu allanut akunnermiliuttuuvugut, aqqutaalu tamaat meeraq tasiorsinnaavarput. Suliap immikkoortortaa tamanna isumaqarluinnarpoq”.Meeqqap oqaloqatiginera pisariaqarpoq eqqissimanissaq qanimullu peqataanissaq”Ullut tallimaannaat atorfinni suligaluarlunga, misigisinnaavara, Najortimi meeqqat pitsaasumik siunnersornissaannut piffissaqarluarluta, piffissarlu meeqqap toqqissisimalernissaanut pingaaruteqartuuvoq. Meeraq ajornartorsiutilik oqaloqatigissagaanni pisariaqarpoq eqqissisimanissaq qanimullu peqataanissaq. Meeqqamik oqaloqateqarneq tuaviuunneqarsinnaanngilaq”, Line oqarpoq. Line meeqqat najortimut attaveqarsinnaanissaat isumagiutigalugu, aamma pisortanut - soorlu sulianik suliaqartunut politiinillu -attaveqaataasartussaavoq. ”Suliassap ilaata tamatuma aallartinnissaa qilanaarivara. Allanngorartinneqarsinnaasunik suleriaaseqarneq pisortanillu suleqateqarneq pingaaruteqaqaat. Najortimi annertuunik suliaqarsinnaavugut, kisianni suliassat kisimiilluta suliarisinnaanngilagut”, Line naggasiivoq.Piviusut: Kalaallit Nunaanni meeqqat inuusuttullu 700-t missaat angerlarsimaffimmik avataanut inissitaapput. Meeqqat ilarpassuisa pisinnaatitaaffitik nalusarpaat, iliuusissatut pilersaarut imminnut tunngasoq nalusarpaat, sooq angerlarsimaffimmi avataanut inissinneqarnertik nalusarpaat, imminnullu tunngatillugu suliap ingerlanneranut akuutinneqanngisaannarsimallutik. Najorti aqqutigalugu qularnaarneqassaaq, Kalaallit Nunaanni meeqqat atugarliornerpaat, isumaginninnikkut suliani imminnut tunngasuni peqataatinneqarlutillu tusaaneqarnissaat.Najorti pillugu annertunerusumik atuagassaqarpoq uaniNajorti Isumaginninnermut Inatsisinillu Atuutsitsinermut Naalakkersusioqarfimmit,  Pitsaaliuinermut Isumaginninnermullu Aqutsisoqarfimmit, Nunafonden-imit aamma Foreningen Østifterne-mit tapersigaavoq.