Inngilit kalaallit Kalaallit Meerartaat taperserniarlugit tuniniarneqarput

Januaarip aallartilaarnerani immikkut illuinnartumik tunissutisivugut. Tunissut inngilinit – peqqissaartumik kartionimit qiortakkanit – arnallu marluk Varde-mi najugallit ikinngutigiinnerannit aallaavilik. Inngilit suliaapput Kari Mette-mit, ikinngutini Kuka peqatigalugu isumassarsisimagamik Kari Mette-p inngililiai Kalaallit Meerartaannut iluaqutissatut tuniniarniarlugit.Kari Mette oqaluttuarpoq: ”Maanna ukioq qaangiuppoq Kukalu oqaloqatigiittaleratta inngililioriarluta siunertamut pitsaasumut iluaqutaasussamik tuniniarniarlugit. Meeqqat kalaallit pitsaasumik atugaqarnissaat sivisuumik eqqarsaatigisarnikuuara, taamaammallu aamma Kalaallit Meerartaannut ilaasortanngornikuullunga. Kuka Kalaallit Nunaanni peroriartornikuuvoq, taamaalilluni attaveqaatiminik ikiuussinnaalluni, Nuummilu pisiniarfik Asiarpak attavigileratsigu, inngilinillu tuniniaajumammat, isumassarsiarput piviusunngorsinnaalerpoq”.Inngilit kalaallisut isikkullit qangatullu qilertillit marlukkaarlugit suliaapput. Isumaa tassaavoq inngilip aappaa inummut asasamut ikinngummulluunniit tunniunneqassasoq, asanninnermut ikinngutigiinnermulluunniit ilisarnaatitut.”Uannut inngilit tassaapput asanninnermik, nuannaarnermik neriunnermillu oqariartuuteqartut. Inngilit aamma tassaapput inunnik illersuillutillu paarsisut. Isumaqarpungalu tamanna silarsuarmut ingerlatissallugu pitsaasuusoq. Aamma Kalaallit Nunaanni meeqqanut iluaqutaasinnaanerat immikkut nuannaarutigivara”, Kari Mette naggasiivoq.