Ikiuigasuartartussanik pilersitsinissamut tapiissutit naammanngillat

Danmarkimi naalakkersuisut 5,3 millionit koruuninik Tasiilami isumaginninnikkut ikiuigasuartartussanut immikkoortitsisimanerisa tusarliutigineqarnera politikkikkut ajunngisaartoqarneranik ersersitsinerullunilu kalaallit qallunaallu nukissanik tamanik katersinermikkut Tasiilamilu meeqqat isumaginninnikkut ikiorneqarnissaannut aaqqiissuteqaqatigiinnermikkut Tasiilami meeqqat ikiorneqartariaqarnerannik nassuerutiginninneruvoq. Tamannalu Kalaallit Meerataasa Peqatigiiffiannit qujarupparput, tapiissutigineqartulli naammanngillat. Tamatumunnga atatillugu Nuummi allattoqarfimmi pisortaq, Nike Berthelsen, ima oqarpoq:20 millionit koruuninik immaqa tapiissuteqaqqilersut”Tasiilami ajornartorsiutit anigornissaannut suliniuteqarnermut tapersiivugut, – Tasiilarmiummi annikilliorput, tamannalu Tasiilami meeqqat eqqugaarujussuarnerannik kinguneqarpoq. Nalunanngilluinnarpoq Tasiilami pissutsit atuuttut allanngortinneqarluinnartariaqartut iliuuseqarfigilertupallannissaannut tapiissutaasut naammanngitsut. Taamaattumik Peqqissutsimut, Isumaginninnermut Inatsisinillu Atuutsitsinermut Naalakkersuisup taamatuttaaq Danmarkip Isumaginninnermut Nunamullu Namminermut Ministeriata suliniummik annerusumik pilersitsisoqarnissaanut 80 millionit koruuninik ukiuni sisamani atugassanngorlugit agguarneqartussanik tapiissuteqaqqittoqarnissaanut pilersaarnerat soorunami aamma nuannaarutigaarput. Kajumissaarutaannaagallarpulli, sulilu aalajangivittoqarani, malinnaavugulli suliniutinillu annerusunik pilersitsisoqarnissaanut tapersiivugut, Nike Berthelsen oqarpoqSuliniuteqarfiusuni najugalinnik peqataatitsineq aaqqiissutissat ilagaat Nike Berthelsenip suliniutit pilersinneqartussat siunissami ungasinnerusumi kinguneqarluarnissaat qulakkeerumallugu najukkani suliniuteqarfiusuni najugallit peqataasinneqartarnissaasa eqqumaffigisassatta pingaarnersaat ilaginerarpaa. Nike Berthelsen ima oqarpoq:”Najortimik taallugu meeqqanut illersuisussaqartitsinermut aaqqissuussarput tunngavigalugu najukkani suliniuteqarfigisatsinni najugalinnik peqataatitsinermik taakkulu piginnaasaannik ineriartortitsinermik misilittagaqarluarpugut. Najortinngortussanik pikkorissaagaangatta najukkani suliniuteqarfiusuni najugallit kommunigisaminni meeqqanut isumaginninnikkut sullinneqartunut illersuisussanngortillugit pikkorissartarpavut. Meeqqat najukkaminni inersimasunik qanigisaminnik illersuisoqartarnissaat najukkaminnilu ikortigisinnaasutut isigisaminnik ikiorteqartarnissaat sulinitsinni tunngavigilluinnarpavut. Najukkani suliniuteqarfigisatsinni innuttaasunik peqataatitsisarnerput inuiaqatigiinni pissutsinik allannguinissatsinnut pingaaruteqarluinnarsinnaavoq, suliniutilli taamaattut kinguneqarluarnissaat eqqarsaatigalugu ikiuigasuartartussanik pilersitsinissamut tapiiissuteqartoqaannarani allatigut iliuuseqartoqarnissaa aamma pisariaqarpoq. Inatsisartut meeqqat tapersersorneqarnissaannut inatsisaannik naapertuinissarput qulakkeerumallugu nunatsinni kommunit qanimutsuleqatigaavut. Isumaginninnermi sullissisut meeqqallu suleqatigalugit meeqqamut pitsaanerpaanik aaqqiissutissanik ujartuinissaminnut piareersimasunik Tasiilami meeqqanut illersuisoqartitsivugut. ”Politikerit suliniuterput taperserpassuk Tasiilami meeqqanut sunniuteqartorujussuusinnaavoq”, Nike Berthelsen oqarpoq nangillunilu: Suliniummik ataasiinnarmik ingerlatsineq naammanngilaq”Najortinik illersuisussaqartitsinermut aaqqiissuussarput Tasiilami pissutsit allanngortinnissaannut imaaliallaannaaq iluaqutaasinnaanngilaq, taamaammat suliniutigisatsinni kisiartaaginnarani Tasiilamiunik meeqqanut atugarliornerpaanut isumaginninnikkut ikiuussinnaasunik peqataatitsinermik aallaaveqarluinnarpoq”, Nike Berthelsen taama oqarpoq, naggasiinerminilu politikerit kajumissaarpai:”Danmarkimi nunatsinnilu oqartussaasut suliniuteqarnerminni nunatsinni meeqqat pillugit suliniuteqartartuusugut tassa innuttaasunik meeqqanillu qanimut suleqateqartartuusugut peqataatissagaatigut neriuutigaara. Tasiilami siunissami qaninnerusumi sunniuteqartussanik suliniuteqarnermut tunngatillugu - aammali siunissaq ungasinnerusoq eqqarsaatigalugu ataavartumik pitsaaliuineq tunngavigalugu suleriutsit tungaasigut pisariaqartilluinnakkatsinnik - ataqatigiissaarisoqarnissaa pisariaqarpoq”.