Avannaata Kommuniani meeqqat najortimik illersuisoqarsinnaanngussapput

Kalaallit Meerartaata Avannaata Kommuniatalu suleqatigiinnermut isumaqatigiissutertik atsiorpaat. Tassa imaappoq, Avannaata Kommunia Kalaallit Meerartaallu Avannaata Kommuniani meeqqat isumaginninnikkut sullissat najortimik illersuisussaqartitaanissaannik qulakkeerinnittussamik ukiunilu pingasuni atuuttussamik suleqatigiinnermut isumaqatigiissusioqatigiipput. Isumaqatigiissutaat Avannaata Kommuniata Isumaginninnermut Ataatsimiititaliaata akueraa, tamannalu ilaatigut Avannaata Kommuniata Najortimik taallugu meeqqanut illersuisussaqartitsinermut aaqqissuussamut aningaasalersueqataasussanngorneranik kinguneqarpoq. Avannaata Kommuniata Meeqqanut Sullissinermut Ingerlatsiviani pisortaagallartoq, Norma Kristensen, ima oqarpoq:  ”Kalaallit Meerartaallu isumaqatigiissuteqarnerput kommunitta meerartaanut sunniuteqartorujussuusussaammat pingaaruteqarpoq. Meeqqanik isumaginninnikkut sullissinermi aalajangiinerit meeqqat inuunerannut ulluinnarnilu inuunerannut sunniuteqartorujussuusarput, taamaattumik meeqqat isumaginninnikkut sullitat soorunami peqataatinneqartassapput, tamannalu Najorti tunngavigalugu qulakkiissavarput”. Kalaallit Meerartaata Nuummi allattoqarfiani pisortap, Nike Berthelsenip, isumaqatigiissusiornerat aamma usorsisimaarutigisorujussuuaa: ”Najorti meeqqat pillugit isumaqatigiissummi maleruagassanik malinninnissatsinnik qulaakkerisuuinnarani meeqqat toqqissisimanissaannut meeqqallu arajutsisinneqaratik aalajangiisoqartarnissaanut iluaqutaanissaa aamma pineqarpoq. Isumaginninnermilu sulianik ingerlatsinerni periutsinik peqqissaartunik tutsuiginartunillu pilersitsisoqarnissaa aamma pineqarpoq”. Tamannalu Avannaata Kommuniani meeqqanut iluaqutassaaq. Najortili meeqqanuinnaanngitsoq iluaqutassaaq. Nike Berthelsen oqaluttuarpoq: ”Meeqqanut illersuisoq meeqqap kissaataanik pisariaqartitaanillu pingaartitsilluni isumaginninnermi suliamik ingerlatsisoqarnissaanut qulakkeerisuusarpoq. Najortili isumaginninnermi siunnersortimut aamma iluaqutaasarpoq.Assersuutigalugu meeqqanut illersuisut meeqqat kommunimeersunik ataatsimeeqateqannginneranni ataatsimeeqatereernerisalu kingorna oqaloqatigeqqaarlugillu inaarutaasumik oqaloqatigisarpaat. Najortit taamaalillutik isumaginninnermi sulianik ingerlatsisartut nalunaaquttap-akunnerpassui atorlugit sulianik ingerlatsinissaraluannut meeqqanillu iluatsinngitsuukkajuttartumik atassuteqateqarluarnissaannut oqilisaassisarput. Meeqqat ataatsimiinnissani najuunniissaannik qulakkeerinninnissaq ilungersunartoorujuussuukkajuttarmat meeqqanut illersuisut meeqqanik oqaloqateqartarnerat meeqqanillu tatigineqalernissaminnik qulakkeerinnittarnerat isumaginninnermi sulianik peqqissaartumik tutsuiginartumillu ingerlatsisoqartarnissaanut pingaarutilerujussuupput”. Avannaata Kommunia Kalaallit Meerartaat peqatigalugu najortimik meeqqanut isumaginninnikkut sullitanut illersuisoqartitsinermut neqerooruteqartalernissamut nunatsinni kommunini isumaqatigiissusioqateqartut tamannalu ilutigalugu inatsisartut meeqqat tapersersorneqarnissaannut inatsisaannik  naapertuisut pingajoraat. Kommune Kujalleq aamma Qeqqata Kommunia Kalaallit Meerartaat peqatigalugu aamma isumaqatigiissusioreerput.  Kalaallit Meerartaata allattoqarfiani pisortap, Nike Berthelsenip, nunatsinni kommunit tamarmik isumaqatigiissuteqarfigilertussanngungajalernerannut qilanaarpoq: ”Nunatsinni meqqaat kikkulluunniit najortimik illersuisoqarsinnaanissaat anguniarparput. Avannaata Kommuniatalu isumaqatigiissuteqarfigereernerata kingorna tamanna tamakkiisumik piviusunngortingajalerparput”, Nike Berthelsen oqarpoq. Kalaallit Meerartaat Ilulissani najortinngortussanik ulluni makkunani pikkorissartitsileruttorpoq.