Meeqqanik illersuisartut Qaanaami illersuisuusarnissaminnut piareerput
Kalaallit Meerartaanni Kalaallit Nunaanni meeqqanik illersuisartussanik ingerlaavartumik ilinniartitsisarpugut. Kingullermik Qaanaami, tassanilu arnat pingasut maanna ilinniarsimanerminnut allagartartaarput, meeqqallu isumaginninnikkut suliassanut akuulersillugit illersuisartussatut piareerlutik.
Meeqqanik illersuisartutta ’Najortit’ patajaallisarneqarlutillu annertusaaviginissaat sulissutiguarparput, meeqqamik sapinngisamik amerlanerpaat namminneq isumaginninnikkut suliassaalersillutik illersorteqarnissaat siunertaralugu. Taamaammat nuna tamakkerlugu angalasarnigut pingaaruteqaqaat. ”Taamaaliornikkut ’Najortit’ pillugit kommunini sulianik suliaqartut akornanni paasititsiniaasarpugut kommuninillu suleqateqarnerput patajaallisartarlugu – minnerunngitsumillu meeqqanik illersuisartussanik nutaanik ilinniartitsisarluta”, Nuummi allattoqarfimmi pisortaq Julie Lynge oqarpoq.
Ullut pingasut ulapaarfioqalutik ingerlatsiviupput – pitsaasumik pingaarutilinnillu oqaloqatigiittoqartarluni, isumaginninnikkut inatsisinik nutaanik ilisimasaqartoqalerluni aamma meeqqanik isiginneriaatsit pissuserissaarnikkullu akunnattoorfiusinnaasut oqallisigineqarlutik. Mika Oshima Etah, Kaalannguaq Uvdloriaq aamma Sara Kristiansen maanna imminnut ’Najortitut’ taasinnaalerput, meeqqallu kommunimi isumaginninnikut suliassaalersut tapersersortarnissaat qilanaaralugu.
Piviusut: ’Najortit’ tassaapput meeqqanik illersuisartut, Kalaallit Nunaanni meeqqat pisortanik naapitsineranni peqataatinneqarnissaannik qularnaarisartut. Najorti tassaavoq tasiorti ikorfartuisorlu. Tamannalu meeqqat tamarmik pisariaqartippaat – minnerunngitsumik meeqqat atugarliortut, immaqalu angerlarsimaffimmik avataanut inissitaasussanngortut imaluunniit ilaqutariinnut paarsisartunut imaluunniit ulloq unnuarlu angerlarsimaffimmut inissitaareersimasut. ’Najortit’ aqqutigalugit Kalaallit Meerartaasa Najorti meeqqat inuunerminni atugarliortut tapersersortarpaat, meeqqallu suliani imminnut tungasuni tusaaneqarnissamut pisinnaatitaaffeqarneri qularnaartarlugit 2022-mi meeqqanik illersuisartut illersuisutut suliani 103-ni peqataapput.