Kangaamiuniit aallalernermi qungujulaarnerit qullipinnerillu
Aasaanerani atuanngiffimmi pisussat annersaat qanilliartortillugu nunaqarfimmi meeqqat inersimasullu qilanaaqaat. Sapaatip-akunnerini marlunni aasaanerani tammaarsimaarneq; pinnguarnerit, timersornerit, pinngortitamut angalaarnerit pilersitsiffiusunillu sammisaqarnerit, tassaapput tamanit qilanaarineqartut, Kangaamiunilu sunngiffimmi sammisassaqartitsinermut pisortap pitsaaliuinermillu ataqatigiissaarisup Miki Willumsenip qaammatini arlaqartuni pilersaarusiorluni suliai annertunerpaaffimminniilerput, namminneq kajumissusertik tunngavigalugu sulisut aqqaneq-marluk USA-meersut, Hollandimeersut, Tysklandimeersut, Italiameersut, Nunatsinneersut Danmarkimeersullu juulip qaammataa aallartilaartoq Kangaaminut tikimmata.
Nunarsuarmit tamarmit namminneq kajumissutsimikkut sulisut Kangaamiunut tikinnerat soorunami persuarsiornartuuvoq, Miki oqaluttuarpoq: ”Kangaamiuni innuttaasut aasaanerani pisussamut qilanaarnikooqaat, aasaaneranilu tammaarsimaarnissaq sioqqullugu piareersaatinut peqataallutik. Assersuutigalugu meeqqat inuusuttullu aperivagut suut sammissallugit pissanganartinneraat, taamaammallu arlallit kissaatigisaminik piviusunngornissaat neriuutigaat, akunnerpassuarnilu volleyball-ernissartik, arsamik pinnguarnissartik pisuttuarnissartillu qilanaareqaa”.
Kangaamiut Kangerlussuup Kangerlussuatsiallu paavisa qanitaanni alianaaqisumik inissisimavoq.
Qilanaarisaallumi piviusunngorput. Miki oqaluttuarpoq: ”Aasarsiornerput meeqqanik
Nuannaartunik ulikkaarpoq aamma angajoqqaat, aanaa/aataakkut namminnerlu kajumissutsimikkut sulisut tamarmik nuannersumik misigisaqartitseqataapput – meeqqanut namminnerlu kajumissutsimikkut sulisunut. Aasarsiortitsinermi sammisassat aatsaat nal. 12 aallartittaraluartut, meerarpassuit nalunaaqutaq aqqaninnguinnartoq atuarfiup eqqaanut katersuutereersarput, iseqqaartuuniarlutik ullormilu sammisassat aallartipallakkusullugit”, Miki Willumsen oqaluttuarpoq.
Ingerlatsinerup nalaani ajornartorsiutit
Nuannaaleruttornermi aamma unamminartunik pisoqarpoq. Miki oqaluttuarpoq: ”Alianaraluaqisumik nunaqarfimmi imminortoqarpoq, soorunami tamatigut sunniuteqartumik. Taamaattoq pilersaarutaareersut ingerlatiinnarnissaat toqqarparput. Aammattaaq namminneq kajumissutsimikkut sulisut sisamat coronamik tunillatsissimasut paasineqarpoq, mattussaagallartariaqarlutillu, taamaalillutalu akimmiffeqalaarpugut, corona pissutigalugu ullut sammisaqartitsiffiit pingasut taamaatiinnartariaqarlutigit. Kisianni meeqqat namminnerlu kajumissutsimikkut sulisut qimaleramik qullipinneri naapertorlugit, aasarsiortitsineq tamanit pissarsiffiulluarpoq”, Miki oqaluttuarpoq.
Namminneq kajumissutsimikkut sulisut meeqqallu imminnut ataqatigiillualernerisa inuulluaqqusinissaq artornarsitippaat.
Miki Willumsenip nalilerpaa aasarsiortitsineq aamma Kalaallit Meerartaannik suleqateqarneq piffissamut sivisunerusumut sunniuteqarluassasut. ”Namminneq kajumissutsimikkut sulisunit tamatta isumassarsitinneqarluarlutalu ingerlatassanut isumataartinneqarput. Ilaanneeriarluni avataaneersunit allanngunissamut isumassarsitinneqartariaqartarpugut, meerartatsinnut inuusuttatsinnullu naleqqiullugu suut pitsaanerulersissinnaanerlutigit allaanerusumillu ingerlassinnaanerlutigit eqqarsaatissinneqarluta. Aasaanerani atuanngiffik naammasseqqammivoq, taamaammallu soorunami misigisarpassuit inissinniaqqaalaartariaqarput. Kisianni neriuutigalugulu qularinngilara, aasarsiortitsineq sapaatip-akunnerini marlunni ingerlatsinermit sivisunerujussuarmik sunniuteqassasoq”, Miki Willumsen naggasiivoq.
Sunngiffimmi sammisassaqartitsinermi pisortaq Miki Willumsen sulinini pillugu namminneq kajumissutsimikkut sulisunit immikkut qujaffigineqarpoq.
Kangaamiuni aasarsiortitsineq 4. julimiit 16. julimut ingerlanneqarpoq. Aasarsiortitsineq piviusunngorpoq Kalaallit Meerartaasa aamma Qeqqata Kommuniata suleqatigiinnerisigut.
Kalaallit Meerartaat aamma Qaanaami aasarsiortitsivoq 13. julimiit 7. augustimut.
