Salomon-ip annikinnerusut annertunerusullu assilisarpai
Suulluunniit annikikkaluartut immikkut isiginiarneqarsinnaasut Salomonip assiliniartarpai. ”Sunilluunniit annikikkaluani ulluinnarni nuannaartut takunissaat pingaaruteqartut nassaarineqarsinnaapput”, taama oqarpoq Salomon. Nammineq kajumissutsimigut sulisuuvoq, namminerlu misiginikuullugu kalaallinik meeqqanik allanik inersimasutsialannillu ataatsimooqateqarneq qanoq sunniuteqarluartigisinnaanersoq.
Junimi sapaatip-akunnerani kingullermi Kalaallit Meerartaat kalaallinut meeqqanut ilaqutariinnullu 21-nut Bornholmimi aasarsiortitsivoq. Salomon nammineq kajumissutsimigut sulisutut peqataavoq, assiliissutinilu nassarlugu – taamaaliortuartarpormi ”ulluinnarni pisartut amerlanertigut taamaattussaannartut isigisavut assilisinnaajumallugit”.
Salomon aamma nammineq kajumissutsimigut sulisutut 2021-mi Kullorsuarmi aasarsiortitsinermi peqataavoq.
Salomon oqaluttuarpoq: ”Avatangiiserisakka assilissallugit nuannarinerpaasarpara, illut, inuit pinngortitarlu. Assiliiniartillunga arlalitsigut suulluunniit allatut isiginneriaaseqarlunga isiginiartarpakka”.
Ataatsimooqatigiinnerup imminut naleqartinnermik pissarsitippaanga
Kisianni Salomon assiliiginnartanngilaq. ”Nammineq kajumissutsikkut sulisutut peqataavunga annermik meeqqat peqatiginissaat nuannersunillu misigisaqartinnissaat siunertaralugu”, Salomon oqarpoq. ”Sivisunerusumik angalatilluta eqqissilluta meeqqat ilisariartulersarnerat nuannarivippara. Taamaalilluta suut nuannarineraat suullu pikkoriffigineraat paasiartulersarpagut”.
Salomonip kalaallinik meeqqanik allanik inersimasutsialannillu peqateqarluni nukittorsaataasumik ataatsimooqatigiiffimmut peqataaneq nammineq misiginikuuaa. Salomon Kalaallit Meerartaannut 2015-imiilli attuumassuteqarnikuuvoq, siullermik meeqqatut inuusuttutullu, kingornagullu nammineq kajumissutsimigut sulisutut.
”Attaveqaateqarnerup ataatsimooqatigiinnerullu imminut naleqartinnermik tunivaannga, tamannalu siornatigut Kalaallit Meerartaannut peqataasalinngikkallarama amigaatiginikuuara. Tamannalu inuuninnut annertuumik sunniuteqarpoq. Inuit nuannerluinnartut naapinnikuuakka. Inuit ulloq manna tikillugu suli nuannareqisakka, naak maanna inersimasunngoraluarluta tamattalu immikkut alloriaqqinnikuugaluarluta ilaanneeriarluta naapeqatigeeqqilaarnissarput suli piffissaqarfiginiartarparput. Meeqqat inuusuttullu kalaallit allat ataatsimooqatigiiffinni uanga peqataaffigisanni misiginikuusama assinginik misigisaqarterusuppakka”.
“Meeqqat ujaqqanik qalipaapput, pisuttuaqatigiittarpugut,sissaliartarpugut, qaqorsaammik pullartaliortarpugut aamma Hammershus alakkarparput, - ataatsimooqatigiittuarpugut”, Salomon Bornholmimi aasarsiorneq pillugu oqaluttuarpoq.
