Nuummi allattoqarfimmi sulisut amerlipput
36-nik ukiulik Lis Anker Petersen Peqatigiiffik Kalaallit Meerartaat-mi qaammatini pingasuni atorfeqarsimalereerpoq. Suliniutilerinermi aqutsisutut allattoqarfimmi Nuummiittumi atorfeqarpoq, atorfimminilu pingaarnertut suliassai suliniummut Sapiimmut Nuummi, Ilulissani, Qaqortumi Maniitsumilu 9. klassini 10. klassinilu atuartunut naleqqussarlugu ingerlanneqartartumut tunngapput. Inuusuttuaqqat ilinniakkamik aallartikkusutaminnik suliffimmillu pilerigisaminnik toqqaanissaminnut kaammattorneqarnissaat sillimanissaallu siunertaralugit suliniut Sapiik ingerlanneqartarpoq.Peqatigiiffik Kalaallit Meerartaat-mi atorfigilersimasannut sooq qinnuteqarpit?Ilinniartitsisutut ilinniarsimasuullungalu NUUK Internationale Friskolemi ukiuni qulingiluani ilinniartitsisuunikuuvunga. Tamatuma saniatigut perorsaanermik aqutsinermillu suliatigut aallussinermut tunngasutigut ilinniaqqinnikuuvunga, suliatigullu nutaanik misileerusulluinnalersimallunga. Misilittagarilikkakka taamatuttaaq perorsaanermik aqutsinermillu suliatigut aallussinermut tunngasutigut ilinniaqqinnikuunera Sapiik pillugu suliniutilerinermi aqutsisutut atorfimmi atorluarsinnaasorisimavakka, inuusuttuaqqallu pillugit suliniutilerinerup tungaatigut pitsanngorsaasoqarnissaa ineriartortitseqqittoqarnissaalu eqqarsaatigalugit taama eqqarsaatersuuteqarsimaninnut tunngavissaqarluarsimasunga erserpoq.Suliniutip Sapiip ingerlanneqartarnissaa sooq pingaaruteqarpa?Inuusuttuaqqat siunissami sunngornissaminnut suli aalajangersimanngitsut periarfissaminnilluunniit ilisimanninngitsut sullikkumallugit suliniut Sapiik ingerlanneqartarpoq. Inuusuttuaqqat inunnik maligassiusussaminnik isumassarsivigisinnaasaminnillu taamatuttaaq piginnaasatigut imminut tatigilernissaminnut iluaqutigisinnaasaminnik naapitaqarnissaannut periarfissaqartinneqartarnissaat pingaaruteqartorujussuuvoq.Pingaarnertut suliassatit suuppat?Suliniutilerinermi aqutsisutut atorfittaarama suliniut Sapiik suliniutillu allat Peqatigiiffik Kalaallit Meerartaat-mit ingerlanneqartartut pillugit soorunami nassuiaanneqarluaqqaarpunga. Taakku pillugit tamakkiisumiik ilisimasaqarlualernissara sulissutigaarput, tamannalu piffissap ingerlanerani annerusumik angusaqarfigiumaarparput. Taamattuttaaq sulisuvut suliniutilerinermik piginnaasaqarluarnissaannik, sulisutigut malittaareqqiisoqartarnissaanik ataatsimullu isigalugu suliatigut aallussatsinnik naammaginartumik naammassinnittoqartarnissaanik qulakkeerinninneq suliassarpassuatta ilagaat. Ingerlatsinikkut ineriartortitseqataanissannut qilanaartorujussuuvunga. Suliniutitta ullutsinni pissutsit atuuttut aallaavigalugit ingerlanneqartarnissaat taamatuttaaq suleriutsit nutaat pissanganartullu tunngavigalugit inuusuttuaqqanut aqqutissiuisarnissarput kaammattuisarnissarpullu pingaaruteqarpoq.Suliniut Sapiik tunngavigalugu sulinerup pitsaaqutai suuppat?Inuusuttuaqqat peqatigalutigit ingerlariaqqinnissaannut aqqutissiuisarnerput pitsaaqutigisaata ilagaat. Inuusuttuararpassuit inuunerminni angorusutarpassuaqartarput, angorusutaminnilli piviusunngortitsiniarnerminni unammillernartut nalaattagaat amerlavallaarujussuarput.Suliniut Sapiik tunngavigalugu sulinermi unamillernarnerpaat suuppat?Sulinitsinni unammillernarnerpaatut nalaattakkavut illoqarfimmiit illoqarfimmut allanngoralaartarput, sulinerpullu illoqarfinni ataasiakkaani ingerlalluartarpoq. Illoqarfinni allani inuusuttuaqqat ornigullutik peqataasarnissaat sulissutiginerusariaqartarparput. Tassa imaappoq, suliniummik ingerlatsinerput illoqarfinnut inuusuttuaqqanullu ataasiakkaanut naleqqussartuartariaqartarparput.Suliniummut Sapiimmut tunngatillugu takorluukkatit suuppat?Inuusuttuaqqat inuunerminni pitsaanerusunik atugaqarnissaminnut tapersersorteqartuartarnissaat qulakkeerumallugu suliniummik Sapiimmik ineriartortitsinissarput takorloorpara. Imminut paasinerulernissaminnut ilinniartinneqarlutillu ilinniarfiit suliffiillu tungaasigut periarfissaminnik ujartuisinneqassapput. Taamatuttaaq inuusuttuaqqat ileqqutoqqanik namminerlu inuunerminni atukkatigut – kinguaariinnut tulliuttunut ingerlateqqitassaminnik – allannguinermut maligassiuisunngortinnissaat takorloorpara. Peqatigiiffik Kalaallit Meerartaat-mi sulinivit nuannequtiginerpaasaa suua?Inoqativut pitsaanerusumik atugaqarnissaannut sunniuteqaqataalluni suliniaqatigiinnermi annertuumi peqataanera sulinimma nuannequtiginerpaavaa. Sulininnullu atatillugu angalasarnikka suleqatikkalumi nuannareqaakka, taamaattorli Peqatigiiffik Kalaallit Meraartaat-p inoqatitsinnut sunniuteqarluartumik suliniuteqartarnera pingaarnerpaasorigakku tamanna nuannarinerpaavara.Suliniut Sapiik aningaasaateqarfinnit ukunanit aningaasaliiffigineqarpoq; Dansk Tennis Fond, Erik Thunes Legat, Hurtigruten Foundation taamatuttaaq Ole Kirk's Fond.