Nike Berthelsen Kalaallit Meerartaanni suliunnaalertoq

Nike oqaluttuarpoq:”Sulininni suliakka pingaaruteqarput, ersarissunillu naammasserusutaqarlunga. Tassa kalaallit meerartaat  tapersersorneqarnissamik pisariaqartitsinerpaat pitsaanerusunik atugaqartitaalissasut. Tamanna sulininni suliassanni tamani pingaarnerpaatut isigaara. Kalaallit Meerartaata nunatsinni allattoqarfiata aaqqissuussaanerata patajaatsuunissaa ingerlalluarnissaalu Kalaallit Meerartaata sunniuteqarnissaanut pingaaruteqarmata Nuummi allattoqarfiata aaqqissuussaaneranik pitsanngorsaaneq suliassama pingaarnerpaat ilagisimavaat, nukippassuillu Najortimik taallugu meeqqanut illersuisussaqartitsinermut aaqqissuussatsinnik ineriartortitsinermut siammarterinermullu aamma atorpakka. Najorti kalaallit meerartaannut isumaginninnikkut sullitanut neqeroorutaavoq, kommuninilu suleqatigiinnermut isumaqatigiissuteqarfigisassatsinni pingasuusuni marluinnaat meeqqat tapersersorneqarnissaat pillugu isumaqatigiissummi maleruagassanik naammassinninnissatsinnut qulakkeerisussanik suleqatigiinnermut isumaqatigiissusioqatiginissaat amigaataaginnalerpoq. Najortip meeqqat toqqissisimanissaannut meeqqallu arajutsisinneqaratik aalajangiisoqartarnissaanut iluaqutaanissaa pineqarpoq. Isumaginninnermilu sulianik ingerlatsinerni periutsinik peqqissaartunik tutsuiginartunillu pilersitsisoqarnissaa aamma pineqarpoq - suliassarlu tamanna pingaartuuvoq, Nike Berthelsen, allattoqarfimmi pisortatut 2020-mi februaarip naanerani suliunnaartussaq, oqarpoq.Suliatigut susassareqatigiiusugut suleqatigiilluarnerulernissatta angunissaa suliassatta pingaanerit aamma ilagisimavaat. Nike ima oqarpoq: “Suliatigut susassareqatigiiusugut, aammali Naalakkersuisut inuussutissarsiornermillu aallussallit peqatigalugit, suleqatigiinnerulernissarput pisariaqarpoq. Iliuuseqarnissatsinut akisussaaqatigiilluta kivitseqatigiittariaqarpugut. Tamatumanilu kalaallit meerartaasa pisinnaatitaaffiisa eqquutsinneqarnissaat kalaallillu meerartaasa toqqissisimasumik alliartornissaannik ilinniagaqarnissaminnullu sapiissuseqarnissaannik piginnaasaqarnissaannillu qulakkeerinninnissat pineqarput.”Meeqqanut iluaqutaasussanik peqatigiillutik suleqatigiilluartut amerliumaartut, Nike Berthelsenip upperaa.”Isumaqarpunga suleqataarusuttut amerliartortut. Akisussaaffimmik kivitseqataarusuttut arlaqarput, akisussaaffimmillu immitsinnut arsaattuunnissarput siornatigutulli ernummatigineqartiginngilaq. Tamatumanimi meeqqat pineqarput, aaqqiissuteqaqatigiikkuttalumi meeqqanut iluaqutaanerpaassaaq”, Nike Berthelsen naggasiivoq.Nike Berthelsen Qeqqata Kommuniani atugarissaarnermut pisortatut marsip aallaqqaataani atorfinissaaq.