Meeqqanut illersuisut amerliartuinnavipput
”Kommuneq Kujallermi meeqqanut illersuisutut atuuffeqartussanik pikkorissartitseqqammernerput nuannaarutigisorujussuuarput”, Nuummi allattoqarfimmi pisortaq Nike Berthelsen oqarpoq, nangipporlu: ”Meeqqat isumaginninnermi sulianik imminnut tunngasunik ingerlatsinerni peqataatinneqartarnissaat inatsisitigut piumasaqaataaginnarani meeqqalluunniit pisinnaatitaaffiinik naapertuiffiuinnarani periusiuvoq meeqqanut inuusuttuaqqanullu malunnartumik pitsaasumillu sunniuteqartartoq. Najortinik nunatsinni kommunini tallimaasuni sulisunik meeqqanut illersuisoqartitsivugut, tamatumanilu anguniagarput ersarippoq: Nunatsinni meeqqat kikkulluunniit isumaginninnikkut sullinneqartussanngortut najortimik illersuisoqarsinnaatitaassapput”.
Najortit isumaginninnermi sulianik ingerlatsinerit ingerlarnginut oqilisaassisartutNajortinik illersuisoqartitisinermi meeqqat pillugit isumaqatigiissummi maleruagassanik malinnittoqarnissaa kisiat pineqartanngilaq. Najortit meeqqat toqqissisimanissaannut meeqqallu arajutsisinneqaratik aalajangiisoqartarnissaanut iluaqutaanissaat pineqarput. Taamatuttaaq isumaginninnermi sulianik ingerlatsinerni periutsinik peqqissaartunik tutsuiginartunillu pilersitsisoqarnissaa pineqarpoq. Nike oqaluttuarpoq:”Meeqqanut illersuisoq meeqqap kissaataanik pisariaqartitaanillu pingaartitsilluni isumaginninnermi suliamik meeqqamut pineqartumut tunngasumik ingerlatsinikkut meeqqap pineqartup pisinaatitaaffiinik naapertuisoqarnissaanut meeqqallu pineqartup ikiorneqarnissaanut qulakkiisuuinnarani meeraq pineqartoq pillugu suliamik peqqissaartumik tutsuiginartumillu ingerlatsisoqarnissaanut aamma qulakkeerisuusarpoq. Assersuutigalugu meeqqanut illersuisut meeqqat kommunimeersunik ataatsimeeqateqannginneranni ataatsimeeqatereernerisalu kingorna ataatsimeeqatigeqqaarlugillu inaarutaasumik ataatsimeeqatigisarpaat. Najortit taamaalillutik isumaginninnermi sulianik ingerlatsisartut nalunaaquttap-akunnerpassui atorlugit sulianik ingerlatsinissaraluannut meeqqanillu iluatsinngitsuukkajuttartumik atassuteqateqarluarnissaannut oqilisaassisarput. Meeqqat ataatsimiinnissani najuunniissaannik qulakkeerinninnissaq ilungersunartoorujuussuukkajuttarmat meeqqanut illersuisut meeqqanik oqaloqateqartarnerat meeqqanillu tatigineqalernissaminnik qulakkeerinnittarnerat isumaginninnermi sulianik peqqissaartumik tutsuiginartumillu ingerlatsisoqartarnissaanut pingaarutilerujussuupput”.Meeqqqat kikkulluunniit Najortimut sianersinnaapputNunatsinni sumiluunniit meeqqanut illersuisussaqartitsisoqarsinnaalernissaa qulakkeerumallugu nunatsinni innuttaasut kikkulluunniit najorteqarneranik paasissutissiivigineqarnissaat pingaaruteqarpoq. Qaqortumi meeqqanut illersuisussanik pikkorissartitsinitsinnut atatillugu Kalaallit Meerartaasa Peqatigiiffiat isumaginninnermi sulianik ingerlatsisartunut – isumaginninnermi sulianik meeqqanut illersuisunik peqaataatitsiffiusunik ingerlatsinermi periusissanik pinngitsooratik ilisimannittussanut – workshoppertitsivoq. Aaqqissuussatsinnilli kommunini isumaginninnermi sulianik ingerlatsisartunut ilisimatitsissuteqartarnerput naammanngilaq. ”Meeqqatut inuusuttuaqqatulluunniit soorlu angerlarsimaffimmiit qimaanissamut iliuuseqarniarnermi tamakkiisumik isiginninniarneq ajornakusoortorujussuusinnaavoq. Meeqqat taama nalaataqaraangamik najortimut saaffiginninnertik iluaqutigisorujussuusarpaat. Taamaattumik meeqqat kikkulluunniit najortinik illersuisussaqarsinnaatitaanertik najortinullu qaqugukkut saaffiginnissinnaanertik ilisimasariaqarpaat”, Nike Berthelsen oqarpoq, taassumalu meeqqanut inuusuttuaqqanullu paasititsiniaatigisartik - meeqqat inuusuttuaqqallu najortinut toqqaannartumik sianertariaannaanissaat qulakkeerumallugu paasissutissanik paasiuminartunik imalik – innersuussutigaa. “Meeqqat kikkulluunniit 290028-mut ulluinnarni ullaakkut arfineq-pingasuniit ualikkut sisamat tungaanut sianersinnaapput. Sianernissamut piffissaliussaq nalliutereeraangat sms-ersinnaapput, tamatuma kingorna aqaguani sianerfigisassavagut”, Nike Berthelsen naggasiivoq.
Kalaallit Meerartaasa Peqatigiiffiat Qeqqata Kommunialu suleqatigiinnermut isumaqatigiissummik 2018-imi atsioqatigiipput. Tamatuma kingorna Kommune Kujallerlu isumaqatigiissusiorput, aamma Kommuneqarfik Sermersoorlu suleqatigiinnermut isumaqatiginninnialeruttorput. Peqatigiiffitta nunatsinni kommuninik tamanik tallimaasunik suleqatigiinnermut isumaqatigiissusioqateqarsimanissaa siunertaavoq. Inatsisartummi meeqqat tapersersorneqarnissaannut inatsisaannik naapertuisoqarnissaa; tassa imaappoq, meeqqat isumaginninnermi suliamik imminnut tunngasumik ingerlatsinermi peqataatinneqartut najortimik meeqqanut illersuisoqarnissaminnut neqeroorfigineqartarnissaat suleqatigiinnermut isumaqatigiissutini tamani pineqarpoq.Isumaginninnermut Aqutsisoqarfik, aningaasaateqarfiit; Nunafonden, Jashafonden,
- juni Fonden taamatuttaaq suliniaqatigiiffiit; Ladies Circle Nuummiittoq aammalu Østifterne aningaasanik najortimik taallugu meeqqanut illersuisussaqartitsinermut aaqqissuussatsinnut tapiissuteqartuupput.