Inuit Games efterskolilernissamut qilanaartuusipput

Ukiut tamaasa Galtrup Efterskole nuna tamakkerlugu inuusuttunik aggersaasarpoq efterskolemilu sapaatip akunnerani naanersiortitsilluni, timersuutinik assigiinngitsunik sammisassaqartitsilluni, Arctic Winter Gamesini sammineqartartunik isumassarsiaasunik. Seeqqut sakissamut tutsittarlugit pissinneq aammalu noqqoruunneq Danmark tamakkerlugu inuusuttunit unammijuaassutaasarput. Ujaminnannissaq ataqqinaaserneqarnissarlu unammijuaassutigisarpaat – pingaarnertulli nuannisarnissaq pinerullugu.Toqqissisimanermit nikeriarneqGaltrup Efterskolemi sapaatip akunnerata naanersiorneq naammasseqqammersoq pisoqarfiusimaqaaq timersuutit illalaarpalunnerillu amigaataanngivillutik, aammali isumassarsiornissaq siunertaralugu peqataanerusimavoq. Christina oqaluttuarpoq: ”Efterskole tassaavoq Peqatigiiffik Kalaallit Meerartaanni periarfissarpassuit ilaat, aammalu Galtrup Efterskolemi ukiut tamaasa kalaallit efterskolertussat 25-40-t akornanni allatsittarput. Tamanna angerlarsimaffinnit toqqissimanartunit efterskolerluni nikeriarnissamut oqinnerulersitsissutaasinnaavoq ajornannginnerulersitsillunilu.Inuusuttut pillugit sulerusuppugutInuusuttut kisiisa sullinnissaat angalaaqatigalugit sammisaqaqatigalugillu nutaajuvoq. Peqatigiiffik Kalaallit Meerartaanni suleqatigiinni aqusisoq Jeppe Bülow Sørensen oqaluttuarpoq:”Sivisuumik misigisimavarput, 14-iniit 17-inut ukiullit suliniarfiginerat ataqatigiissarneqartariaqartoq. Ukiuni taakkunani inuusuttut inuuneranni pisoqarfiusaqaaq, taavalu peqatigitillugu tamaanga killinnermi assersuutigalugu Danmarkimi Pitsaanerusumik Inuuneqalernissaq pillugu suliniumi neqeroorutaasartut kajumigineeruttarput, taakkuummata angajoqqaanut meeqqanullu 16-it tikillugit ukiulinnut sammitinneqartartut. Taamaattumik neqeroorutivut assigiinngitsut illoqarfiillu assigiinngitsut aqqusaarlugit neqerooruteqartalerpugut, taamaasillutik inuusuttut kalaallinik inuusuttoqatiminnik katerisimaaqateqartarniassammata. Taakkunani sammineqartarput kingunissalimmik ataatsimoorfeqarnissaq attaveqalernissarlu, aammali inuusuttut ilinniagaqalernissaannut aqqutissiuussinissaq. 9. klasse naammassigukku sussaanga? Suna sapinngilara, aamma qanoq iliussaanga? Apeqqutit taakkuupput taamatut ukioqaleraanni takkuttartut, taamaammat ikiuukkusuppugut, aqqutissiuussilluta kaammattuillutalu”.AllanngorneqalerfikChristina isumaqataavoq, piffissami tamatumanerpiaq inuusut inuunerannut allanngorarfiulersarmat, tamannalu immini mianernartuuvoq. Christina oqaluttuarpoq: ”Taamatut inuusuttut aalajangerniartarnerat piumasaqaateqarfiusaqaaq. Tassami paasiniartussaavaat, 9 klasse naammassereeraanni suut periarfissaanersut, aammalu nutaanik sammisaqalernermi allannguutit nalaatassallu malinnaaffigiuminaassinnaasarlutik. Taavalu angerlarsimaffimmi angajoqqaanik aqqutissiuussisinnaasunik ikiuussinnaasunillu najugaqateqanngikkaanni, taava mianernartumik inissisimasoqalersarpoq”.Sapaatip akunnerata naanerani pisimasut inuttut pisinnaasanut, efterskolerluni inuunermi piumasaqaatinut misiligutaapput: ”Efterskole tassaavoq inunnik nutaanik naapitsiffik nuannisarfillu, kisiannili aamma malittarisassaqarpoq pinngitsoorani malinneqartussanik, aammalu isumalluarnermik naapitsiffiusartoq. Tamakkulu sapaatip akunnerata naanerani pisuni qilanaartuuserfiupput”.