Illersuisoqartitsineq meeqqat ikiorneqarnissamik pisariaqartitsinerpaat sernissorneqarnerannut tunngaviuvoq

Kommuneqarfik Sermersooq aammalu Peqatigiiffik Kalaallit Meerartaat ulluni makkunani suleqatigiinnermut isumaqatigiissusiuleruttorput. Suleqatigiinnermut isumaqatigiissut Kommuneqarfik Sermersuumi meeqqat kommunimit isumaginninnermik sullinneqartut Najortimik illersuisussaqartinneqartalernissaannut tunngaviussaaq. Kommune Kujalleq aammalu Qeqqata Kommunia Peqatigiiffik Kalaallit Meerartaat peqatigalugu assingusumik isumaqatigiissusioreerput. Najorti meeqqamut illersuisuusarpoq, Najortilu meeqqap isumaginninnikkut suliamik imminut tunngasumik ingerlatsinermi tusaaneqartarnissaata peqataatinneqartarnissaatalu qulakkeerneqarnissaanut akisussaasuusarpoq. Taamatuttaaq Najorti suliamik ingerlatsinermik aallartitsisoqarnissaanut nukingisaaruteqarsinnaatitaavoq. Tamatumani aaqqissuussap Kalaallit Nunaanni tamarmi atuutilersinneqarnissaa sulissutigineqaleruttorpoq.Peqatigiiffik Kalaallit Meerartaat-p allattoqarfiani Nuummiittumi pisortaq Nike Berthelsen ima oqarpoq: ”Kalaallit Nunaanni meeqqat kikkulluunniit Najortimik illersuisoqarsinnaanissaat anguniagaraarput. Tassa imaappoq, tamatumani neqeroorut Nuummi aammalumi Kommuneqarfik Sermersuup illoqarfiini allani Kommuneqarfik Sermersuumit atuutsinneqassaaq. Meeqqanik illersuisussaqatigiinnik kommunip immikoortortaani tamani ikiuussinnaasunik pilersitsinissatsinnut Najortinngortussanik sapinngisamik naammattumik pikkorissartitsinissarput suliassatta ilagaat”.TasiilamukartitsisoqangajalerpoqKommuneqarfik Sermersuumi sulisussanik Najortitut pikkorissarusuttunik pissarsiornerput ilutigalugu Peqatigiiffik Kalaallit Meerartaat-meersut Tasiilamukartussanngortinneqarput. ”Najortinngortussanik Tasiilami pikkorissartitsissaagut, sulianillu ingerlatsinermut piumasaqaatit pillugit paasisisimasaqarlualerumalluta ataatsimeeqattaarpugut. Meeqqat Najortinit sapinngisamik pitsaanerpaamik ikiorneqartarnissaat qulakkeerumallugu pissutsit ilisimasaqarfigilluarnissaat pingaaruteqarpoq”, Nike Berthelsen oqarpoq.Piviusulersaarutip “Byen hvor børn forsvinder”-ip aallakaatinneqarnerata kingunerisaanik Tasiilami meerarpassuit ikiorneqarnissamik pisariaqartitsisut pissutigalugit Tasiilaq pillugu annertuumik oqallittoqarpoq. Tamatumunnga atatillugu Nike Berthelsen ima oqaaseqarpoq: ”Meeqat inersimasuukkajuttunit meeqqanik paarsisussaagaluartunit sumiginnagaasarnerat innarlerneqartarnerallu alianarlunilu akuersaarnanngilaq. Tamanna ilaginnaanerujussuuvoq, kikkullu tamarmik; suliniaqatigiiffiit, kommunit innuttaasullu ilaginnaanerujussuit pinaveersaartinneqarnissaannut iliuuseqartoqarnissaanut suleqataassapput. Tamatumani inersimasut akisussaaqataanikkut iliuuseqarnissaminnut piareersimasinnaasut pisariaqartinneqarput. Tamatumunnga atatillugu aaqqiissuussaq Najorti inersimasuusugut akisussaaqataanikkut pimoorussilluinnarluta iliuuseqarnissatsinnut tunngaviusinnaasut ilagaat.”