Filmit ilinniartitsinermut najoqqutassialiat Kalaallit Nunaanni takutinneqartut

Sumiginnaaneq angajoqqaatullu perorsaalluariaaseq pillugit filimit taakku marluusut ima qulequtaqarput: ”Ikioqatigiitta” (”Skal vi hjælpes ad?”) aamma ”Takusinnaaviuk?” (”Kan du se det?”). Filmit taakku isumaginninnermik sulialinnut meeqqanik ilaqutariinnillu naapitaqartartunut ilinniartitsinermut najoqqutassiaralugit suliaapput.Filmit ilaqutariinnut ikiortarialinnut piginnaanertusaataasutSuliniutilerinermi aqutsisoq Gunver Justesen oqaluttuarpoq: ”Isumaginninnermik suliallit meeqqanik sumiginnakkanik alaatsinaalluarnerusalernissaat angajoqqaallu ikiortariallit angajoqqaatut perorsaanikkut piginnaanertusarnissaat siunerataralugit filmit takutillugillu Kalaallit Nunaannilu angalavugut. Filmit perorsaasunut, ilinniartitsisunut, peqqissaasunut, ernisussiortunut, ilaqutariinnik sullissisunut, tarnip pissusiinik ilisimasalinnut misissuisartunullu, sullissisunut aamma meeqqanik ilaqutariinnillu sullitaqartartunut allanut naleqqussarlugit suliaapput. Filmit ilinniartitsinermut najoqqutassialiat suliassiissutissanik aamma ilaqarput, meeqqanillu sumiginnakkanik qanoq alaatsinaannissaq suliatigullu susassareqatigiittut suleqaqatigiinerup qanoq pitsanngorsaanissaq ukkataralugit aamma isumasioqatigiisitsisarpugut”, Gunver Justesen oqaluttuarpoq.Naja Lund Kielsen Qaqortumi Ilaqutariinnik Sullissivimmi aqutsisuuvoq, angajoqqaanillu qitornaminnik assigiinngitsutigut ajornartorsiutilinnik peroriartornerminnilu namminneq nalaassimasatik pissutigalugit ilaqutariittut maligassiuisuulluarnissaminnut ajornakusoortitsisunik angajoqqaatulluunniit misilittagaqarluanngitsunik suliffimmini naapittarpai. Filimi ”Ikioqatigiitta?” taakkununnga ilinniartitsissutitut najoqqutarissallugu naleqquppoq. Naja oqaluttuarpoq: ”Ulluinnarni ajornartorsiutit angajoqqaatut nalaattakkat filmimi tassani nassuiarneqarluarput. Suliffipput aqqutigalugu naapitavut ajornartorsiutit assiginngitsorpassuit eqqartorusuttanngilaat, angajoqqaarpassuillu ikioqqullutik saaffiginninnissaminnut sapiguttarput.”Ikioqatigiitta?” ilaqutariinnut takutikkaangatsigu ilaqutariit allat ajornartorsiutiminnut assingusunik aamma ajornartorsiuteqartartut tupaallaatigikkajuttarpaat, filmilu taanna nammineq qanoq iliornissaq sumullu ikiortissarsiornissaq pillugit eqqartueqatigiinnissammut najoqqutarissallugu naleqquttupilussuuvoq”.Angajoqqaanngortussat ileqqupalaanik ingerlatitseqqeerusuttanngillat”Narsami, Nanortalimmi Qaqortumilu angajoqqaanik pikkorissaavugut. Ukkatarisattallu ilaat tassaavoq siusissukkut suliniuteqarneq. Tassa imaappoq, angajoqqaanngortussanik ilinniartitsisarpugut. Angajoqqaanngortussat inuunerminni assigiinngitsunik soorlu atornerluisuunermik atornerluisooqataanermilluunniit ajornartorsiuteqartuusinnaasarput. Amerlasuut meeraanerminni sumiginnagaasimasuusimasarput, angajoqqaanngortussanngornertillu pissutigalugu ileqqupalaanik ingerlatitseqqeerusuttanngillat. Filmit taakku angajoqqaanngortussat ajornartorsiutiminnik eqqartueqateqarnissaannut aamma angjoqqaatut perorsaanissaminnut piareersarluarnissaannut qitornaminnillu sapinngisamik atugarissaartitsilluarnissaannut najoqqutarineqarluarsinnaapput”, Naja Lund Kielsen oqaluttuarpoq.Filmit taakku Kalaallit Nunaanni illoqarfinni tamani takutereerpavut, suliniutilerinermi aqutsisup Gunver Justesenip oqarnera naapertorlugu isumaginninnermik suliallit tassa ilaqutariinnik ikiortarialinnik sullissisartut filmit nersorluarpaat.”Filmit ilinniartitsinermut najoqqutassialiat piumaneqartarmata filmiliortitsivugut. Filmit nutaat kalaallisut oqaasertallit amigaataasupilussuupput, isumaqarpugullu filmit angalanitsinni takutereeraangatsigit qujarunneqartaqisut”, Gunver Justesen oqaluttuarpoq nangillunilu: ”Filmit takutikkiartornerisa kingornagut utereeraangatta sunniuteqartuartarmata immikkuullarissuupput. Isumasioqatigiisitsinitsinni isumaginninnermik suliallit filminik taakkuninnga atuinissaannut ilinniartittarpavut, taakkulu sulinertik filmit taakku najoqqutaralugit nangittarpaat. Filmillu taamaalillutik annertuumik sunniuteqalersarput”. Filmit; ”Ikioqatigiitta” (”Skal vi hjælpes ad?”) aamma ”Takusinnaaviuk?” (”Kan du se det?”) kalaallisut oqaasertaqarput, taakkulu suliniutilerinermi aqutsisoq Gunver Justesen e-mailikkut allaffigalugu allatsissinnaavatit: gj@fgb.dkLinkit uku aamma toornerisigut isiginnaarsinnaavatit:https://fgb.dk/film/takusinnaaviuk-kan-du-se-det/https://fgb.dk/film/ikioqatigiittaskal-vi-hjaelpes-ad/