Aasaanerani sammisassaqartitsinissaq iluatseratartoq: Meeqqat ilaqutariillu kalaallit aasaanerani tammaarsimaassapput

Aasaanerani sammisassaqartitsinissatta aallartinnerata sapaatit akunnerata siulliani Sønderjyllandiliartoqassaaq. Dansk Folkehjælpimik suleqateqarnerput kalaallit ilaqutariiaat 15-it Danmarkimi illoqarfinni assigiinngitsuneersut Feriecenter Løjtimi aasarsiortussanngornerannik kinguneqarpoq. Feriecenter Løjti naluttarfeqarlunilu tassannga 250 meterisut ungasitsigisumi sissaqarpoq, taamaammat meeqqat naluutilisarnissartik eqqaamassariaqarpaat. Aammali isikkamik arsaallutik ajugaaniutissapput, sissami volleyballissapput, nerriveeqqami arsaarassapput, pississaarfimmi pississaassapput kaffillertunukassallutillu. Ilaqutariiaat ingammik Kalaallit Meerartaata anaananut ilaqutariinnullu naapeqatigiittarfianeerput, meeqqallu nukarliit inuunermik aallartitsilluarnissaat angajoqqaallu ilisarisimasaminnik attaveqaqateqarnissaat angajoqqaatullu iluaqutissaminnik najoqqutassaqarluarnissaat suliniutini taakkunani siunertaavoq.”Ernikka nuannaatsassaqaat”Erna Angubesen peqataasussat ilagaat. Erna erninilu marluk, Suiaq arfineq-marlunnik ukiulik Minillu sisamanik ukiulik, Aarhusimi najugaqarput. Erna Ilulissaniit Aarhusimut ukiut arfinillit matuma siorna nuuppoq, anaanallu naapeqatigiittarfiannut Aarhusimilu Kalaallit Meerartaannut ukiuni tallimani kingullerni orniguttarluni. Erna Kalaallit Meerartaata anaananut ilaqutariinnullu naapeqatigiittarfiinut orniguttarnermigut attaveqaqatigilluartakkaminik ilisarisimasartaarlunilu ikinngutinnaartaarnikuuvoq, taakkualu aamma ernini peqatigalugit aasaanerani sammisassaqartitsinissatta aallartinnerata sapaatit akunnerata siullianni peqataassalluni: ”Qilanaartorujussuuvunga. Ilaqutariittut feeriaqatigeerngaalerpugut. Danmarkimi maannamut ukiuni arfinillinni najugaqarpunga, tamaaniinninnilu ernikka allamukaqatigalugit feeriaqatiginissaannut periarfissaqarnikuunngilanga. Ikiorsiissutinik pisartagaqartuulluni naammattusaarnarmat periarfissaqarnikuunngilanga. Ernikka taama misigisaqartussanngornerat isumaqaqaaq”, Erna oqarpoq. Taassuma ernini aasaanerani allamukarlutik feeriartussanngornertik paasippassuk nuannaatsassaqisut takorloorpaa. ”Qilanaarpallaarnertik pissutigalugu utaqqikataleqinammata suli oqaluttuutinngilakka. Assingusumimmi siornatigut misigisaqarnikuunngimmata oqaluttuunnissaannut qilanaarpunga. Aasaanerani tammaarsimaaqataareerunik misigisarpassuarminnik meeraqatiminnut oqaluttuassaqalissapput. Tipaatsunnarpoq”, Erna oqarpoq.Aasaanerani allanik aamma sammisassaqartitsissaagutMeeqqat kalaallit aasaanerani sammisassaqartitsinitta aallartinnerata sapaatit akunnerata aappaanni aamma tammaarsimaariartussapput. Meeqqat 30-t, arfineq-pingasut aqqaneq-marlullu akornanni ukiullit, angajoqqaatik qimallugit Fuglsøcentretimi Nationalparken Mols Bjergemiittumi aasaanerani sapaatit akunneranik ataatsimik sivisussusilimmik feeriarlutik tammaarsimaassapput. Meeqqat taakkua Kalaallit Meerartaata suliniutaani assigiinngitsuni peqataasarput, aamma sulisut kajumissutsimillu ikiuuttut katillutik 15-it meeqqat assigiinngitsorpassuarnik misigisaqarluartinnissaannut piareersimapput. Dansk Folkehjælp suleqatigalugu aasaanerani tammaarsimaartussanngorput.Sapaatit akunnera 27-mi 28-milu aasaanerani tammaarsimaartitsinerit marluk saniasigut Aalborgimi kalaallit ilaqutariiaat tallimat Frederikshavnimut tammaarsimaariartorlutik feeriassapput. Arbejdsmarkedets Feriefond Aalborgimi Alabu Boligforening suleqatigalugu Aalborgimi kalaallit ilaqutariaat feeriartinnissaannik suliniuteqartuuvoq, Kalaallit Meerartaalu Aalborgimi ataqatigiissaarisuulluni.